34 میچز کا سیزن نومبر، دسمبر میں ہوگا، کھلاڑیوں کی رجسٹریشن کی آخری تاریخ 12 ستمبر مقرر
دبئی :(پی این پی ) ڈی پی ورلڈ انٹرنیشنل لیگ ٹی20 کے پانچویں سیزن کے لیے بڑی پری آکشن سائننگز مکمل ہوگئی ہیں، جس کے بعد لیگ میں عالمی کرکٹ کے کئی بڑے ستاروں کی آمد سے مقابلے کی شدت مزید بڑھنے کی توقع ہے۔ نیوزی لینڈ کے جارح مزاج اوپنر فن ایلن، جنوبی افریقہ کے اسٹار بلے باز ڈیوڈ ملر اور ہینرک کلاسن جبکہ آسٹریلوی آل راؤنڈر مارکس اسٹوئنس سیزن 5 کی نمایاں سائننگز میں شامل ہیں۔فن ایلن ابوظہبی نائٹ رائیڈرز جبکہ ڈیوڈ ملر اور ہینرک کلاسن گلف جائنٹس کی نمائندگی کریں گے۔ تینوں کھلاڑی پہلی مرتبہ ڈی پی ورلڈ آئی ایل ٹی20 میں ایکشن میں دکھائی دیں گے، جبکہ مارکس اسٹوئنس تین سال کے وقفے کے بعد دبئی کیپیٹلز میں واپسی کریں گے۔سیزن 4 کے کئی اہم کھلاڑی بھی اپنی فرنچائزز کے ساتھ برقرار رکھے گئے ہیں۔ ابوظہبی نائٹ رائیڈرز نے جیسن ہولڈر اور سنیل نارائن، ڈیزرٹ وائپرز نے شمیرون ہیٹمائر، دبئی کیپیٹلز نے روومین پاول اور مصطفیز الرحمن، جبکہ ایم آئی ایمریٹس نے نکولس پورن، راشد خان اور روماریو شیفرڈ کو برقرار رکھا ہے۔ شارجہ واریئرز کے اسکواڈ میں سکندر رضا بھی واپس آگئے ہیں۔دفاعی چیمپئن ڈیزرٹ وائپرز نے افغانستان کے مجیب الرحمٰن کو سائن کیا ہے، ایم آئی ایمریٹس نے ویسٹ انڈیز کے شیرفین ردرفورڈ جبکہ شارجہ واریئرز نے جیمز ونس کو اپنے اسکواڈ کا حصہ بنا لیا ہے۔چھ ٹیموں پر مشتمل 34 میچز کا ڈی پی ورلڈ آئی ایل ٹی20 سیزن 5 نومبر اور دسمبر 2026 میں کھیلا جائے گا، جبکہ کھلاڑیوں کی حتمی سلیکشن کے لیے پلیئر آکشن یکم اکتوبر 2026 کو دبئی میں ہوگا۔ ہر فرنچائز کو پری آکشن مرحلے میں چار غیر ملکی کھلاڑی سائن کرنے کی اجازت تھی، جبکہ باقی اسکواڈ آکشن کے ذریعے مکمل کیے جائیں گے۔آکشن کے لیے کھلاڑیوں کی رجسٹریشن کا عمل جاری ہے اور رجسٹریشن جمع کرانے کی آخری تاریخ 12 ستمبر 2026 مقرر کی گئی ہے۔ آکشن کے بعد ہر ٹیم کو مزید ایک وائلڈ کارڈ سائننگ کی اجازت بھی ہوگی۔