جدہ: یومِ آزادی پاکستان کی تقریبات کے سلسلے میں اسکانکم (Asconcom) کمپنی کے زیرِ اہتمام منعقد ہونے والے "قائدِ اعظم آزادی کپ 2026کی ٹرافی رونمائی کی پُروقار تقریب مقامی ہوٹل میں منعقد ہوئی، جس میں پاکستانی کمیونٹی کی ممتاز سماجی، کاروباری اور صحافتی شخصیات کے علاوہ ٹورنامنٹ میں شریک تمام آٹھ ٹیموں کے مالکان، کپتانوں، آفیشلز اور کھلاڑیوں نے بھرپور شرکت کی۔تقریب کا آغاز تلاوتِ کلامِ پاک سے ہوا، جبکہ نظامت کے فرائض سید جعفر اور شاہین آفریدی نے خوش اسلوبی سے انجام دیے۔ تقریب کے مہمانِ خصوصی پاکستان قونصلیٹ جدہ کے پریس قونصلر عرفان چوہدری تھے، جبکہ ممتاز سماجی رہنما چوہدری اکرم گجر، چوہدری اظہر وڑائچ اور پاکستانی کمیونٹی کی دیگر معروف شخصیات بھی اس موقع پر موجود تھیں۔اسکانکم کے چیئرمین چوہدری شفقت محمود نے اپنے خطاب میں کہا کہ قائدِ اعظم آزادی کپ 2026 کے انعقاد کا مقصد یومِ آزادی پاکستان کو شایانِ شان انداز میں منانے کے ساتھ ساتھ نوجوانوں کو صحت مند اور مثبت سرگرمیوں کی طرف راغب کرنا، کھیلوں کے فروغ کو یقینی بنانا اور اوورسیز پاکستانی کمیونٹی میں اتحاد، اخوت اور قومی یکجہتی کے جذبے کو مزید مضبوط کرنا ہے۔ انہوں نے کہا کہ کھیل نوجوانوں میں نظم و ضبط، ٹیم ورک، برداشت، قائدانہ صلاحیتوں اور حب الوطنی کے جذبات کو فروغ دینے کا بہترین ذریعہ ہیں، اسی لیے اسکانکم ہر سال ایسے مثبت اور تعمیری ایونٹس کے انعقاد کو اپنی سماجی ذمہ داری سمجھتی ہے۔آرگنائزنگ کمیٹی کے ارکان انجینئر عبدالمتین اور انجینئر سید جعفر نے ٹورنامنٹ کے انتظامات پر تفصیلی بریفنگ دیتے ہوئے بتایا کہ دو روزہ کرکٹ میلے میں آٹھ مضبوط ٹیمیں ٹائٹل کے حصول کے لیے ایک دوسرے کے مدمقابل ہوں گی۔ انہوں نے کہا کہ شائقینِ کرکٹ کو انتہائی سنسنی خیز اور معیاری مقابلے دیکھنے کو ملیں گے اور تمام انتظامات کو بین الاقوامی معیار کے مطابق حتمی شکل دے دی گئی ہے۔انتظامیہ کے مطابق قائدِ اعظم آزادی کپ 2026 کے تمام میچز 6 اور 7 اگست کو جدہ نیٹس گراؤنڈ میں کھیلے جائیں گے، جہاں پاکستانی کمیونٹی کی بڑی تعداد اپنی پسندیدہ ٹیموں کی حوصلہ افزائی کے لیے موجود ہوگی۔ ٹورنامنٹ یومِ آزادی پاکستان کی تقریبات کا ایک نمایاں اور یادگار حصہ ثابت ہوگا۔تقریب کے اختتام پر قائدِ اعظم آزادی کپ 2026 کی خوبصورت ٹرافی کی باقاعدہ رونمائی کی گئی، جس کے بعد تمام ٹیموں کے مالکان، کپتانوں، کھلاڑیوں اور منتظمین نے اس عزم کا اظہار کیا کہ وہ کھیل کے اعلیٰ معیار، سپورٹس مین اسپرٹ اور باہمی احترام کی بہترین مثال قائم کرتے ہوئے اس ایونٹ کو یادگار اور کامیاب بنائیں گے۔