لاہور:پاکستان کرکٹ بورڈ نے ویزا درخواست میں حقائق چھپانے پر ڈومیسٹک کرکٹرحمزہ نذر پر 2 سال کی پابندی عائد کر دی،کرکٹر ہرقسم کی ڈومیسٹک اورانٹرنیشنل کرکٹ نہیں کھیل سکیں گے،بورڈ نے ان پر 10لاکھ روپے جرمانہ بھی عائد کر دیا۔پی سی بی کے مطابق حمزہ نذر پر ویزا درخواست میں گمراہ کن اورنامکمل معلومات دینےکاالزام ثابت ہوا،ویزا عمل میں اہم حقائق چھپانے پرحمزہ نذر کےخلاف تادیبی کارروائی کی گئی۔3رکنی انکوائری کمیٹی نےحمزہ نذرکومؤقف پیش کرنےکامکمل موقع دیا،انکوائری کمیٹی کی رپورٹ پرحمزہ نذر کے خلاف کارروائی کا فیصلہ کیا گیا۔پی سی بی نے واضح کیا ہے کہ غلط معلومات، حقائق چھپانااورگمراہ کن بیانات ناقابل قبول ہیں،پاکستان کرکٹ کی ساکھ کونقصان پہنچانے والاکوئی عمل برداشت نہیں ہوگا۔پابندی عائد کئے جانے پر حمزہ نذر کی جانب سے کوئی ردعمل سامنے نہیں آیا۔کرک انفو کے مطابق حمزہ نذر نے اب تک فرسٹ کلاس کرکٹ میں 16 میچز کھیلے ہیں، جن کی 27 اننگز میں انہوں نے 748 رنز اسکور کیے۔ ان کی بیٹنگ اوسط 29.92 رہی، جبکہ وہ ایک سنچری اور پانچ نصف سنچریاں بھی اپنے نام کر چکے ہیں۔ فرسٹ کلاس کرکٹ میں ان کا سب سے بڑا انفرادی اسکور ناقابل شکست 175 رنز ہے۔حمزہ نذر نے فرسٹ کلاس کرکٹ میں 26 وکٹیں حاصل کیں۔ ان کی بہترین باؤلنگ 49 رنز کے عوض 5 وکٹیں رہی، جبکہ ایک میچ میں ان کی بہترین کارکردگی 130 رنز دے کر 7 وکٹیں حاصل کرنا ہے۔ انہوں نے دو مرتبہ ایک اننگز میں پانچ یا اس سے زائد وکٹیں لینے کا اعزاز بھی حاصل کیا، جبکہ ان کی باؤلنگ اوسط 37.23 اور اکانومی ریٹ 3.68 رہا۔لسٹ اے کرکٹ میں بھی حمزہ نذر نے 15 میچز میں شرکت کی، جہاں انہوں نے 192 رنز بنائے۔ اس فارمیٹ میں ان کا بہترین اسکور 75 رنز ہے، جبکہ ایک نصف سنچری بھی ان کے نام ہے۔ باؤلنگ میں انہوں نے 18 وکٹیں حاصل کیں اور 41 رنز کے عوض 4 وکٹیں ان کی بہترین کارکردگی رہی۔ ان کی باؤلنگ اوسط 24.44 اور اکانومی ریٹ 5.11 ریکارڈ کیا گیا۔ٹی ٹوئنٹی کرکٹ میں حمزہ نذر نے اب تک 10 میچز کھیلے ہیں، جن میں 65 رنز اسکور کیے، جبکہ باؤلنگ میں 3 وکٹیں حاصل کیں۔