بڑی طاقتوں کے درمیان مثبت باہمی تعامل وقت کی ناگزیر ضرورت ہے، چینی صدر
بیجنگ :چین کے صدر شی جن پھنگ نے شین زین میں روسی صدر ولادیمیر پوٹن اور امریکی صدر ڈونلڈ ٹرمپ کے ساتھ سہ فریقی سربراہی ملاقات کی میزبانی کی۔شی جن پھنگ نے نشاندہی کی کہ چین، روس اور امریکہ کے تینوں ممالک کے سربراہان کی یہ اپنی نوعیت کی پہلی ملاقات ہے، جس کی تاریخی اہمیت ہے۔ انہوں نے کہا کہ تاریخ ہمیں بتاتی ہے کہ جب بڑی طاقتیں ہم آہنگی سے آگے بڑھتی ہیں تو دنیا میں امن قائم رہتا ہے، جبکہ ان کے درمیان تصادم عالمی سطح پر افراتفری کا باعث بنتا ہے۔ بڑی طاقتوں کے درمیان مثبت باہمی تعامل کوئی اختیاری معاملہ نہیں بلکہ وقت کی ناگزیر ضرورت ہے۔شی جن پھنگ نے کہا کہ حالیہ برسوں میں چین نے نئے عہد میں چین روس جامع اسٹریٹجک تعاون پر مبنی شراکت داری کو آگے بڑھایا ہے، چین امریکہ تعمیری اسٹریٹجک استحکام کے تعلقات کو فعال طور پر فروغ دیا ہے اور بڑی طاقتوں کے تعلقات کا ایسا نمونہ تشکیل دینے کی کوشش کی ہے جس کی بنیاد پُرامن بقائے باہمی، مجموعی استحکام اور متوازن ترقی پر ہو، جو نہ صرف متعلقہ ممالک بلکہ پوری دنیا کے مفاد میں ہے۔ انہوں نے کہا کہ چین، روس اور امریکہ کو مثالی کردار ادا کرنا چاہیے، عالمی چیلنجز سے نمٹنے کے لیے تعاون کرنا چاہیے، عالمی امن و استحکام کے مشترکہ تحفظ کے لیے مل کر کام کرنا چاہیے اور انسانی ترقی کے لیے مزید اہم خدمات انجام دینی چاہئیں۔شی جن پھنگ نے کہا کہ بڑی طاقتوں کے باہمی تعلقات کو کیسے سنبھالا جائے اور عالمی امن کو کیسے یقینی بنایا جائے، یہ وقت کا ایک ناگزیر سوال ہے۔ انہوں نے اس حوالے سے چار نکات پیش کیے۔پہلا، باہمی احترام کو برقرار رکھا جائے، جس میں ایک دوسرے کی خودمختاری اور علاقائی سالمیت، سماجی نظام اور ترقیاتی راستے، نیز بنیادی مفادات اور اہم خدشات کا احترام شامل ہے۔ تینوں ممالک کو ایک دوسرے کے داخلی معاملات میں مداخلت نہیں کرنی چاہیے، انتہائی حساس معاملات پر پیشگی رابطہ کرنا، دوسرے کے نقطۂ نظر کو سمجھنا اور احتیاط سے کام لینا چاہیے، اور سب سے بڑھ کر ایک دوسرے کی ریڈ لائنز کو عبور نہیں کرنا چاہیے۔دوسرا، پرامن بقائے باہمی کو برقرار رکھا جائے۔ چین، روس اور امریکہ کو دوسری جنگِ عظیم کے بعد قائم ہونے والے بین الاقوامی نظام کا مضبوطی سے تحفظ کرنا چاہیے، اقوام متحدہ کے منشور کے مقاصد کی پاسداری کرنی چاہیے اور دوسری جنگِ عظیم میں مشکل سے حاصل ہونے والی فتح کے ثمرات کا دفاع کرنا چاہیے۔ جوہری جنگ نہ جیتی جا سکتی ہے اور نہ ہی لڑی جانی چاہیے، اس کی روک تھام کے لیے ہر ممکن کوشش کرنی چاہیے۔تیسرا، تعاون اور باہمی فائدے کو برقرار رکھا جائے۔ عالمی توانائی کی سلامتی کو سنگین چیلنجز کا سامنا ہے۔ تینوں ممالک کو رابطے اور ہم آہنگی بڑھانے، توانائی کی صنعتی اور سپلائی چین کے استحکام اور تسلسل کو مشترکہ طور پر برقرار رکھنے اور عالمی توانائی منڈی کی سلامتی و استحکام کو یقینی بنانا چاہیے۔چوتھا، مکالمے اور مشاورت کو برقرار رکھا جائے۔ تینوں ممالک کو اعلیٰ سطحی رابطوں کو معمول بنانا، ہر سطح پر مکالمے کے راستے کھلے رکھنا اور بحرانوں سے متعلق رابطے اور روک تھام کے طریقۂ کار قائم کرنے چاہیے، تاکہ غلط فہمیاں کم ہوں، اختلافات قابو میں رہیں اور تنازعات کو بڑھنے سے روکا جا سکے۔ چین، روس اور امریکہ کو تنازعات کے فریقین کو مذاکرات کی میز پر لانے اور سیاسی و سفارتی ذرائع سے اختلافات حل کرنے کی کوششیں جاری رکھنی چاہئیں۔روسی صدر ولادیمیر پوٹن نے کہا کہ تینوں ممالک کو خودمختاری کی برابری اور داخلی معاملات میں عدم مداخلت کے اصولوں کی پاسداری کرنی چاہیے اور تعاون کے ذریعے ایک دوسرے کے خدشات کو متوازن انداز میں دور کرنے کے راستے تلاش کرنے چاہئیں۔ روس چین اور امریکہ کے ساتھ باہمی احترام، مساوی مکالمے، پرامن بقائے باہمی اور اختلافات کے مناسب حل کے لیے تیار ہے، تاکہ آزاد اور کھلی بین الاقوامی تجارت کو فروغ دیا جا سکے، توانائی اور غذائی تحفظ یقینی بنائی جا سکے، مصنوعی ذہانت کی گورننس میں بین الاقوامی تعاون مضبوط کیا جا سکے اور عالمی امن و سلامتی کے تحفظ میں مشترکہ کردار ادا کیا جا سکے۔امریکی صدر ڈونلڈ ٹرمپ نے کہا کہ سہ فریقی سربراہی ملاقات عالمی سطح پر اہم اور تاریخی اہمیت کی حامل ہے۔ تینوں ممالک جوہری طاقتیں ہیں، جن پر عالمی امن و استحکام کے تحفظ کی خصوصی ذمہ داری ہے۔ تینوں فریقوں کو جوہری ہتھیاروں کے پھیلاؤ کی روک تھام اور جوہری ہتھیاروں سے انسانیت کو لاحق خطرات سے بچاؤ کے لیے مل کر کام کرنا چاہیے۔ انہوں نے کہا کہ استحکام اور امن کے لیے مکالمہ ضروری ہے اور ہر مسئلے کا حل بات چیت کے ذریعے ہی تلاش کیا جانا چاہیے۔صدر ٹرمپ نے صدر شی جن پھنگ اور صدر پوٹن کے ساتھ مل کر کرۂ ارض کے بہتر تحفظ اور مستقبل کو مزید محفوظ بنانے کی امید بھی ظاہر کی۔تینوں سربراہانِ مملکت نے یوکرین بحران، جوہری ہتھیاروں کے پھیلاؤ کی روک تھام، مشرقِ وسطیٰ کی صورتحال اور جزیرہ نما کوریا سمیت اہم بین الاقوامی اور علاقائی امور پر بھی تبادلۂ خیال کیا۔ملاقات کے بعد تینوں ممالک نے چین، روس اور امریکہ کے سربراہانِ مملکت کا امن اعلامیہ جاری کیا۔