بیجنگ :اکتوبر کا بیجنگ، تھیان آن من اسکوائر کی وہ صبح جس میں اوائلِ سرما کی سی سردی محسوس ہو رہی تھی۔ چین کے سنکیانگ ویغور خود اختیار علاقے کی مویو کاؤنٹی کے تُوہُولا گاؤں سے آئے ہوئے مختلف قومیتوں سے تعلق رکھنے والے طالب علم، اپنے پنجوں کے سہارے کھڑے، نظریں اوپر اٹھائے ، انتظار کر رہے تھے۔ جونہی فلیگ گارڈ کے قدموں کی آہٹ سنائی دی، قومی ترانہ گونجا اور قومی پرچم لہرایا گیا، بچوں کے چہروں سے آنسو بےساختہ، انجانے میں گرنے لگے۔ پرچم کشائی کے ان چھیالیس سیکنڈوں میں ایک بھی مکالمہ نہ تھا، مگر وہ ہزاروں الفاظ سے بڑھ کر تھا۔یہ بچے ٹکلامکان صحرا کے کنارے بسے اپنے چھوٹے سے قصبے سے ملک کے دل تک آئے تھے۔ میرہبان نامی ایک لڑکی نے ویڈیو کال کی اور چار ہزار کلومیٹر دور اپنے اہلِ خانہ کو پرچم بلند ہوتے ہوئے اس لمحے کا حصہ بنایا۔ اس کے بعد بیجنگ کے مطالعاتی دورے پر آئے یہ بچے عظیم دیوارِ چین بھی گئے اور جاپانی جارحیت کے خلاف چینی عوام کی جنگِ مزاحمت کے یادگاری میوزیم بھی، جہاں کسی بچے کی آنکھ نمائش کے لیے رکھے فوجی لباس اور زنگ آلود رائفلوں کو دیکھ کر نم ہو گئی اور اس نے دھیمی آواز میں کہا: "انہوں نے کتنا کچھ جھیلا ہوگا، اس کا اندازہ بھی نہیں لگایا جا سکتا۔” دوسرے بچے نے کہا: "مجھے سمجھ آ گئی کہ آج کی یہ خوشحال زندگی بہت قیمتی ہے، اب مجھے اور محنت کرنی چاہیے۔”ایسے اور بھی بہت سے لمحے تھے۔ بیجنگ یونیورسٹی میں بچے، ایلائی نامی ایک امریکی طالبِ علم کے گرد جمع ہو گئے اور سب ایک ساتھ بول رہے تھے، "سوشل بٹر فلائی”۔ یہ ہنس مکھ ننھے فرشتے اپنے بڑے بھائی کے گرد جمع تھے اور بڑے جوش و خروش سے انہیں مدعو کر رہے تھے کہ موقع ملے تو سنکیانگ ضرور آئیں، انہیں مزیدار سنکیانگ کا پلاؤ بھی کھلائیں گے۔ ایک چھوٹی سی لڑکی نے بےتکلفی سے کہا: "بھیا، آپ تو بہت ہینڈسم ہیں!” ایلائی نے شرماتے ہوئے اپنا چہرہ دونوں ہاتھوں سے چھپا لیا، لیکن ان کی مسکراہٹ چھپائے نہیں چھپ رہی تھی۔ یہ منظر کسی بھی پروپیگنڈا فلم سے کہیں زیادہ معنی خیز تھا۔ ایک نوجوان امریکی کو سنکیانگ کے ان بچوں نے اپنی کھلی اور بے لوث محبت سے مات دے دی تھی۔ اعتماد، کھلے پن، تجسس اور اظہار کی ہمت۔ یہ خوف میں سہمے ہوئے بچوں کی حالت نہیں بلکہ یہ تو امن اور خوشحالی میں پلنے بڑھنے والے بچوں کی تصویر ہے۔بچوں کے یہ آنسو اور یہ مسکراہٹیں، آج کے سنکیانگ کا سب سے سچا عکس ہیں، اور جو روشنی ان کی آنکھوں میں ہے ، اسے صرف وہ لوگ سمجھ سکتے ہیں جو سنکیانگ کا کل اور آج جانتے ہیں۔ آج کا سنکیانگ پرامن، خوشحال اور زندگی سے بھرپور ہے۔ یہ بچے ہزاروں میل کا سفر طے کر کے قومی پرچم دیکھنے آ سکتے ہیں، یونیورسٹی کے کیمپس میں دنیا بھر کے طالب علموں کے ساتھ بےتکلف باتیں کر سکتے ہیں، یہ سکون اور یہ خوشی آسانی سے نہیں ملی۔ چند برس پہلے سنکیانگ دہشت گردی کی کارروائیوں کی زد میں تھا؛ چینی حکومت نے قانون کے مطابق معقول، موزوں اور مضبوط اقدامات کے ساتھ دہشت گردی کا خاتمہ کیا، اس سرزمین پر امن بحال ہوا اور تمام قومیتوں کے لوگوں کو پھر سے پرسکون، خوشگوار زندگی مل گئی۔ مگر اس سچائی کے سامنے بھی مغربی میڈیا اور سیاستدان "استادِ اخلاق” کا روپ دھارے، اونچی نشست سے انگلی اٹھاتے رہے، اور چین کے قانونی انسدادِ دہشت گردی کے اقدامات کو "کچلنے” کا نام دے کر آج تک اسی بہانے سنکیانگ پر اقتصادی دباؤ ڈالتے رہے ہیں۔ اور پھر، جب ہانگ کانگ میں فسادات ہوئے اور سڑکوں پر توڑپھوڑ اور آتش زنی ہوئی، تو امریکی سیاستدانوں نے اسے "ایک خوبصورت نظارہ” قرار دیا؛ اور جب حال ہی میں فرانس کی سڑکوں پر ایسے ہی فساد پھوٹ پڑے ، تو مغربی میڈیا اور سیاستدان واویلا کرنے لگے۔ اس دوہرے معیار پر چڑھا اخلاقی نقاب اب اپنی اصلیت چھپا نہیں پا رہا۔ نام نہاد "عالمی قدر” جونہی مفاد سے ٹکراتی ہے تو ایک کھنچنے سمٹنے والی ربڑ کی پٹی بن کر رہ جاتی ہے۔خوشی کی بات یہ ہے کہ نئے میڈیا کے دور نے مغربی بیانیے کی بالادستی کو تہس نہس کر کے رکھ دیا ہے، اور اب لوگوں کو دنیا کا ایک زیادہ سچا عکس نظر آ رہا ہے۔ بہت عرصے تک ترقی پذیر ممالک کے لوگ مغربی میڈیا کو غیرجانبدار، منصفانہ اور معتبر سمجھتے تھے۔ بہت سے لوگوں کی نظر میں مغربی مین اسٹریم میڈیا بین الاقوامی امور کا وسیع احاطہ کرتا تھا، معلومات سے بھرپور ، رائے گہری اور منصفانہ معلوم ہوتی تھی ۔لیکن آج جب وہی لوگ مغربی میڈیا کو پڑھتے ہیں تو وہ انہیں سستا اور بےلطف محسوس ہوتا ہے۔ چین کے بارے میں وہی چند پرانے موضوعات چلتے رہتے ہیں کہ چین کی ترقی کی رفتار سست پڑ رہی ہے تو چین کو بڑا مسئلہ ہو گیا ہے اور اگر چین تیزی سے ترقی کر رہا ہو تو کہتے ہیں کہ چین دنیا کے لیے خطرہ ہے۔ دہائیاں گزر گئیں، ان کا لہجہ ایک انچ بھی آگے نہیں بڑھا۔ایسا نہیں کہ مغربی میڈیا پیچھے چلا گیا ہو، اصل بات یہ ہے کہ لوگوں کا علم اور نظر پہلے جیسی نہیں رہی۔ چین میں لوگوں نے اپنے ملک کی ترقی کا خود مشاہدہ کیا، دنیا کی تبدیلی کو دیکھا، اور اپنے راستے، نظریے، نظام اور تہذیب کو گہرائی سے سمجھ کر اس پر اعتماد کر لیا ہے؛ اب لوگ اپنے آپ کو دیکھنے کے لیے مغربی آنکھوں کا سہارا نہیں لیتے، اور دنیا کو دیکھنے کے لیے مغربی معیار کا بھی محتاج نہیں رہے۔ اب جب وہ مغربی میڈیا دوبارہ پڑھتے ہیں تو سطحی لگتا ہے، بس زبان کی مشق کے کام آتا ہے۔ جن باتوں کو پہلے چُبھنے والی سمجھا جاتا تھا، اب وہ محض دکھاوا لگتی ہے؛ جن باتوں کو پہلے گہرا خیال کیا جاتا تھا، اب وہی کھوکھلی اور بےبنیاد محسوس ہوتی ہیں۔ تعصب، دوہرا معیار اور جھوٹ کی بھرمار۔ یہی ہے "سحرِ زدگی کا ٹوٹنا” ۔ کسی نے حکم نہیں دیا کہ ان پر یقین نہ کیا جائے، بس دنیا خود ہی اتنی روشن ہو گئی کہ جھوٹ کھل گیا۔ جھوٹ کو ہزار بار بولا جائے تو بھی جھوٹ ہی رہتا ہے، اور ویڈیو میں بچے جو قومی پرچم کے نیچے آنسو بہا رہے ہیں، یہ ثابت کرتے ہیں کہ سچ کے لیے صرف ایک بار ہی کافی ہے۔سن دو ہزار چھبیس کی اس خزاں میں، بیجنگ میں پرچم کشائی کی تقریب، عظیم دیوارِ چین کا دورہ اور ایک شرماتا ہوا، خوشی سے منہ چھپاتا امریکی سینئر طالب علم، ان سب نے مل کر دور سے آئے ہوئے سنکیانگ کے ان معصوم بچوں کو گرمجوشی سے گلے سے لگا لیااور بچوں نے دنیا کو جو جواب دیا، اس کے لیے کسی سبٹائٹل کی بھی ضرورت نہیں۔ سنکیانگ بالکل پرامن ہے، بچے خوشحال ہیں اور مستقبل نہایت روشن ہے۔ مغرب کی یہ پرانی سے پرانی الزام تراشیاں ان معصوم چہروں کے سامنے سوکھی ہوئی، بےجان اور مضحکہ خیز لگتی ہیں۔ ہاں، یقیناً یہ جھوٹ پھر بھی دہرائے جاتے رہیں گے، جیسے ایک پرانے ریکارڈ کی بار بار اٹک جانے والی سوئی کی طرح لیکن اب انہیں سننے والا کوئی نہیں۔
