اسلام آباد، : چیئرمین سینیٹ سید یوسف رضا گیلانی نے کہا ہے کہ پاکستان اور چین کی دوستی ایک دیرپا اور لازوال بھائی چارے کے تعلق سے جوڑی ہے، اور باہمی اعتماد، احترام اور غیر متزلزل حمایت پر استوار ہے۔ انہوں نے کہا کہ پاک چین دوستی کو پاکستان بھر میں وسیع سیاسی حمایت حاصل ہے اور یہ قومی اتفاقِ رائے کی عکاس ہے۔
انہوں نے ان خیالات کا اظہار اسلام آباد میں منعقدہ سیمینار سے بطور مہمانِ خصوصی خطاب کرتے ہوئے کیا۔ سیمینار میں عوامی جمہوریہ چین کے سفیر عزت مآب جیانگ زائی ڈونگ، کمیونسٹ پارٹی آف چائنا (CPC) کی مرکزی کمیٹی کے بین الاقوامی شعبہ/پارٹی بلڈنگ ریسرچ انسٹی ٹیوٹ کے دورۂ پاکستان پر آئے ہوئے وفد، پاکستان کی سیاسی جماعتوں کے نمائندگان اور دیگر ممتاز شخصیات نے شرکت کی۔
سیمینار کے آغاز پر چیئرمین سینیٹ نے صدرِ اسلامی جمہوریہ پاکستان آصف علی زرداری کا خصوصی پیغام بھی پیش کیا۔ صدرِ مملکت نے اپنے پیغام میں کمیونسٹ پارٹی آف چائنا کے معزز وفد اور پاکستان کی سیاسی جماعتوں کے نمائندگان کا خیرمقدم کرتے ہوئے کہا کہ پاک چین دوستی وقت کی ہر آزمائش پر پوری اتری ہے اور آج بھی دونوں ممالک اور ان کے عوام کے باہمی مفادات کے فروغ میں اہم کردار ادا کر رہی ہے۔
صدرِ مملکت نے کہا کہ یہ باہمی تبادلہ سیاسی جماعتوں کی ترقی، طرزِ حکمرانی اور ریاستی انتظام کے شعبوں میں ایک دوسرے کے تجربات سے استفادہ کرنے اور باہمی افہام و تفہیم کو مزید فروغ دینے کا اہم موقع فراہم کرتا ہے۔ انہوں نے چین کی ترقی، پیشرفت اور خوشحالی کی قیادت میں کمیونسٹ پارٹی آف چائنا کی کامیابیوں کو سراہتے ہوئے کہا کہ چینی تجربہ ادارہ جاتی استعدادِ کار بڑھانے اور طرزِ حکمرانی کو مزید مؤثر بنانے کے لیے قابلِ قدر رہنمائی فراہم کرتا ہے۔
اپنے خطاب میں چیئرمین سینیٹ نے کہا کہ پاکستان اور چین آہنی برادر اور ہر آزمائش میں ایک دوسرے کے ساتھ کھڑے رہنے والے تزویراتی تعاون کے شراکت دار ہیں۔ دونوں ممالک کے تعلقات روایتی سفارتی روابط سے کہیں آگے بڑھ کر باہمی اعتماد، احترام اور مشترکہ مفادات پر مبنی ایک جامع شراکت داری میں تبدیل ہو چکے ہیں۔
انہوں نے کہا کہ دوطرفہ تعلقات کی بنیادوں کو مزید مستحکم کرنے اور عوامی سطح پر باہمی افہام و تفہیم کو فروغ دینے کے لیے مسلسل سیاسی، پارلیمانی اور ادارہ جاتی روابط ناگزیر ہیں۔ انہوں نے کہا کہ سیاسی جماعتیں قومی پالیسیوں اور تزویراتی شراکت داری کے تسلسل اور پائیداری کو یقینی بنانے میں کلیدی کردار ادا کرتی ہیں۔
چین کی غیر معمولی ترقی اور تبدیلی کے تجربے کا حوالہ دیتے ہوئے چیئرمین سینیٹ نے کہا کہ چین کی کامیابیاں ترقی پذیر ممالک کے لیے قابلِ قدر اسباق فراہم کرتی ہیں، بالخصوص طرزِ حکمرانی، ادارہ جاتی استحکام، معاشی ترقی، غربت کے خاتمے، انسانی وسائل کی ترقی اور ٹیکنالوجی کے فروغ کے شعبوں میں۔
چیئرمین سینیٹ نے ون چائنا پالیسی کے اصول کے لیے پاکستان کے غیر متزلزل عزم کا اعادہ کرتے ہوئے پاکستان کی خودمختاری، علاقائی سالمیت اور قومی ترقی کے لیے چین کی مسلسل حمایت کو سراہا۔ انہوں نے کہا کہ چین پاکستان کی خارجہ پالیسی کا ایک اہم ستون ہے اور پاکستان دونوں ممالک کے درمیان تزویراتی شراکت داری کو مزید مضبوط بنانے کے لیے پرعزم ہے۔
چیئرمین سینیٹ نے کمیونسٹ پارٹی آف چائنا کے قیام کی 105ویں سالگرہ پر چینی قیادت اور عوام کو مبارکباد پیش کی اور باہمی افہام و تفہیم کے فروغ اور ایک دوسرے کے تجربات سے سیکھنے کے لیے جماعتی سطح پر روابط اور تبادلوں کی اہمیت کو اجاگر کیا۔
انہوں نے چین کے ساتھ تعاون کو مزید وسعت دینے کے عزم کا اعادہ کرتے ہوئے اس اعتماد کا اظہار کیا کہ سیاسی، پارلیمانی اور جماعتی سطح پر بڑھتے ہوئے روابط تعاون، باہمی سیکھنے اور ادارہ جاتی ترقی کے لیے نئے مواقع پیدا کریں گے۔
چیئرمین سینیٹ نے پاکستان کے لیے چینی قیادت اور عوام کی جانب سے مسلسل تعاون کو بھی سراہا اور کہا کہ پاک چین دوستی پاکستانی عوام کے دلوں میں ایک منفرد اور انتہائی عزیز مقام رکھتی ہے۔
انہوں نے امید ظاہر کی کہ سیمینار میں ہونے والی تعمیری اور نتیجہ خیز بحث و مباحثہ پاکستان اور چین کے درمیان دوستی، تعاون اور باہمی تعلقات کے بندھن کو مزید مضبوط بنانے میں معاون ثابت ہوگا۔
قبل ازیں کمیونسٹ پارٹی آف چائنا کی مرکزی کمیٹی کے آرگنائزیشن ڈیپارٹمنٹ کے پارٹی بلڈنگ ریسرچ انسٹی ٹیوٹ کے فرسٹ لیول انسپکٹر مسٹر لیو ڈاشیو کی قیادت میں چینی وفد نے چینی سفیر جیانگ زائی ڈونگ کے ہمراہ چیئرمین سینیٹ سے ملاقات کی۔ چیئرمین سینیٹ نے وفد کا پرتپاک خیرمقدم کیا اور کمیونسٹ پارٹی آف چائنا اور پاکستان کی سیاسی جماعتوں و اداروں کے درمیان بڑھتے ہوئے روابط اور تبادلوں کو سراہا۔
چینی وفد کو پاکستان آمد پر خوش آمدید کہتے ہوئے چیئرمین سینیٹ نے کہا کہ جماعتی سطح پر روابط اور تبادلے سیاسی جماعتوں کی ترقی، طرزِ حکمرانی اور ریاستی انتظام کے شعبوں میں مکالمے، باہمی سیکھنے اور تجربات کے تبادلے کے لیے ایک نہایت اہم اور مؤثر پلیٹ فارم فراہم کرتے ہیں- سید یوسف رضا گیلانی نے ماضی میں بطور وزیراعظم اپنے دور چین کا ذکر بھی کیا اور کہا کہ چین کی اعلی قیادت کے ساتھ ملاقاتیں انتہائی مفید رہیں ۔ انہوں نے کہا کہ چین کے ساتھ پاکستان کے تعلقات تاریخی نوعیت کے ہیں اور دونوں ملکوں کے عوام ان دوستانہ تعلقات کو قدر کی نگاہ سے دیکھتی ہے ۔