بیجنگ:چین کے صدر شی جن پھنگ نے جمہوریہ مالدیپ کے صدر محمد معیزو کے نام ایک تہنیتی پیغام میں انہیں مالدیپ کے 61ویں یومِ آزادی کے موقع پر مبارکباد پیش کی۔
اتوار کے روزشی جن پھنگ نے اپنے پیغام میں کہا کہ چین اور مالدیپ کے درمیان دوستانہ تعلقات کی ایک طویل تاریخ ہے۔ دونوں ممالک کے درمیان سفارتی تعلقات کے قیام کو 54 سال مکمل ہو چکے ہیں اور اس عرصے کے دوران دونوں ممالک نے ہمیشہ پرامن بقائے باہمی کے پانچ اصولوں کی بنیاد پر دوستانہ تعلقات کو فروغ دیا ہے، جس سے دونوں ممالک کے عوام کو عملی فوائد حاصل ہوئے ہیں۔انہوں نے کہا کہ 2024 میں صدر محمد معیزو کے دورۂ چین کے دوران دونوں رہنماؤں نے باہمی اتفاق سے چین اور مالدیپ کے تعلقات کو جامع تزویراتی تعاون پر مبنی شراکت داری کی سطح تک بلند کرنے اور چین۔مالدیپ ہم نصیب معاشرے کی مشترکہ تعمیر کے لیے مل کر کام کرنے پر اتفاق کیا تھا۔ شی جن پھنگ نے کہا کہ وہ صدر محمد معیزو کے ساتھ مل کر دونوں ممالک کی روایتی دوستی کو مزید فروغ دینے، مختلف شعبوں میں عملی تعاون کو گہرا کرنے اور چین۔مالدیپ جامع تزویراتی شراکت داری کو مسلسل آگے بڑھانے کے خواہاں ہیں، تاکہ دونوں ممالک کے عوام کو مزید فوائد حاصل ہوں۔اسی روز چین کے وزیرِ خارجہ وانگ ای نے بھی مالدیپ کے 61ویں یومِ آزادی کے موقع پر مالدیپ کی وزیرِ خارجہ اروتشام آدم کو تہنیتی پیغام ارسال کیا۔