بیجنگ : رواں موسمِ گرما میں شدید گرمی سے پریشان یورپی سیاح بڑی تعداد میں چین کا رخ کر رہے ہیں تاکہ یہاں کی خوشگوار آب و ہوا اور طرز کی ٹھنڈک” کا تجربہ کر سکیں۔ ایک سیاحتی پلیٹ فارم کے اعداد و شمار کے مطابق رواں سال گرمیوں کی تعطیلات کے دوران چین آنے والے غیر ملکی سیاحوں کے اعتبار سے دنیا کے سرفہرست 20 ممالک اور خطوں میں یورپی ممالک کا حصہ 30 فیصد رہا، جبکہ گزشتہ سال کے مقابلے میں بکنگ میں 275 فیصد اضافہ ریکارڈ کیا گیا۔ اسی عرصے میں سیاحتی مقامات کے ٹکٹوں کی بکنگ گزشتہ سال کے مقابلے میں 20 گنا سے بھی زیادہ بڑھ گئی۔ صرف برطانیہ، فرانس اور جرمنی سمیت مغربی یورپ کے ممالک کا مجموعی حصہ تقریباً 42 فیصد رہا، جبکہ ان ممالک سے آنے والے سیاحوں کی تعداد میں مجموعی طور پر تقریباً 150 فیصد اضافہ ہوا۔اس سال یورپ شدید گرمی کی غیر معمولی لہر کی لپیٹ میں ہے، جس کے باعث "چینی ایئر کنڈیشنرز” کی طلب میں بھی نمایاں اضافہ دیکھنے میں آیا۔ اعداد و شمار کے مطابق جون کے دوران یورپ کو چین سے برآمد کیے جانے والے ایئر کنڈیشنرز کی تعداد میں گزشتہ سال کے مقابلے میں 72.8 فیصد اضافہ ہوا۔ بہت سے یورپی شہری اب چین آ کر خود اس سہولت کا تجربہ کرنا چاہتے ہیں، جہاں شاپنگ مالز، ہوٹلوں، میٹرو اسٹیشنوں اور دیگر عوامی مقامات پر ایئر کنڈیشننگ کی وسیع سہولت موجود ہے۔ اس کے علاوہ چین کا وسیع جغرافیہ، سرسبز پہاڑی علاقے اور قدرتی سیاحتی مقامات گرمی سے بچاؤ کے لیے متعدد دلکش مواقع فراہم کرتے ہیں۔چین کا سفر اب پہلے سے کہیں زیادہ آسان بھی ہو چکا ہے۔ اس وقت چین نے یورپ کے 35 ممالک کے عام پاسپورٹ رکھنے والے شہریوں کے لیے یکطرفہ ویزا فری پالیسی نافذ کر رکھی ہے، جس کے تحت اہل مسافر زیادہ سے زیادہ 30 روز تک چین میں قیام کر سکتے ہیں۔ چائنا نیشنل امیگریشن ایڈمنسٹریشن کے مطابق رواں سال کی پہلی ششماہی میں چین آنے والے غیر ملکی سیاحوں میں 77.7 فیصد نے ویزا فری سہولت سے فائدہ اٹھایا۔یورپی سیاحوں کو چین کی جانب متوجہ کرنے کی ایک اہم وجہ ملک کی مؤثر حکمرانی اور ترقیاتی کامیابیاں بھی ہیں۔ اب بہت سے یورپی شہری صرف اسکرین پر چین کو دیکھنے تک محدود نہیں رہنا چاہتے بلکہ وہ خود چین آ کر یہاں کی حقیقی صورتحال، جدید ترقی، محفوظ ماحول، عوامی سہولیات اور روزمرہ زندگی کا براہِ راست مشاہدہ کرنا چاہتے ہیں، جس کے باعث چین بین الاقوامی سیاحت کے لیے مزید پرکشش منزل بنتا جا رہا ہے۔