بیجنگ :چین اور امریکہ کی مسلح افواج کے درمیان 2026 کے لیے چین-امریکہ بحری فوجی سلامتی مشاورتی میکانزم کے ورکنگ گروپ کا اجلاس امریکی ریاست ہوائی میں منعقد ہوا۔دونوں فریقوں نے “چین اور امریکہ کے درمیان تعمیری اسٹریٹجک مستحکم تعلقات ” کے اہم اتفاقِ رائے کو رہنما اصول بناتے ہوئے، برابری اور باہمی احترام کی بنیاد پر موجودہ چین-امریکہ فضائی و بحری سلامتی کی صورتحال پر تفصیلی اور تعمیری انداز میں تبادلۂ خیال کیا۔ فریقین نے 2025 میں منعقدہ چین-امریکہ بحری فوجی سلامتی مشاورتی میکانزم کے اجلاس کے بعد سے "چین-امریکہ فضائی و بحری ملاقاتوں کے دوران محفوظ طرزِ عمل کے ضابطۂ کار ” پر عمل درآمد کا جائزہ لیا اور چین-امریکہ بحری فوجی سلامتی سے متعلق امور کو بہتر بنانے کے اقدامات پر بھی تبادلۂ خیال کیا۔فریقین نے اس بات پر اتفاق کیا کہ دونوں افواج کے درمیان مؤثر رابطے اور تبادلۂ خیال سے فرنٹ لائن پر تعینات فوجی دستوں کو اپنے فرائض زیادہ پیشہ ورانہ انداز میں انجام دینے میں مدد ملتی ہے، باہمی تفہیم میں اضافہ ہوتا ہے اور غلط فہمیوں اور غلط اندازوں سے بچا جا سکتا ہے۔اس موقع پر چین نے واضح کیا کہ وہ ” جہازرانی اور فضائی پرواز کی آزادی ” کے نام پر چین کی خودمختاری اور سلامتی کو نقصان پہنچانے کی کسی بھی کوشش کی سخت مخالفت کرتا ہے، اور کسی بھی قسم کی خلاف ورزی، اشتعال انگیزی ۔نگرانی اور مداخلت کو قبول نہیں کرے گا۔ چینی فریق نے اس عزم کا اعادہ کیا کہ وہ قانون اور ضوابط کے مطابق قومی سرزمین کی خودمختاری او ر سمندری حقوق و مفادات کا بھرپور دفاع کرتا رہے گا اور خطے کے امن و خوشحالی کے تحفظ کے لیے اپنا کردار جاری رکھے گا ۔