انٹرنیشنل اسلامک یونیورسٹی اسلام آباد سکولز جی تیرا کیمپس میں سالانہ تقریب تقسیمِ انعامات منعقد

آل پاکستان پرائیویٹ سکولز اینڈ کالجز ایسوسی ایشن کے صدر ڈاکٹر ابرار حسین ملک نے بچوں میں انعامات تقسیم کیے
پاکستانی بچے دنیا بھر میں اپنی صلاحیتوں کا لوہا منوا رہے ہیں، نجی شعبہ تعلیم ترقی میں اہم کردار ادا کر رہا ہے ڈاکٹر ابرار حسین ملک

اسلام آباد(خصوصی رپورٹر) انٹرنیشنل اسلامک یونیورسٹی اسلام آباد(IIUI) سکولز جی تیرا کیمپس میں سالانہ تقریب تقسیمِ انعامات منعقد ہوئی۔ تقریب کے مہمانِ خصوصی آل پاکستان پرائیویٹ سکولز اینڈ کالجز ایسوسی ایشن کے مرکزی صدر ڈاکٹر ابرار حسین ملک تھے، جنہوں نے نمایاں کارکردگی کا مظاہرہ کرنے والے طلبہ میں انعامات، سرٹیفکیٹس اور شیلڈز تقسیم کیں۔اس موقع پر خطاب کرتے ہوئے ڈاکٹر ابرار حسین ملک نے والدین، اساتذہ اور طلبہ کو مبارکباد پیش کرتے ہوئے کہا کہ یہ ایک باوقار اور خوش آئند تقریب ہے، جہاں بچوں کی تعلیمی و ہم نصابی صلاحیتوں کو سراہا جا رہا ہے۔ انہوں نے کہا کہ اگلی جماعتوں میں ترقی پانے والے طلبہ مستقبل کے معمار ہیں جبکہ ان کی تربیت اور کامیابی میں اساتذہ کی محنت قابلِ ستائش ہے۔انہوں نے سکول کی پرنسپل کنول ملک کی خدمات کو سراہتے ہوئے کہا کہ ان کی کوششیں لائقِ تحسین ہیں اور بچوں نے انتہائی اعتماد اور خوبصورت انداز میں اپنی صلاحیتوں کا مظاہرہ کیا۔ انہوں نے کہا کہ بطور مرکزی صدر انہیں ملک بھر کے مختلف سکولز اور کالجز کے دورے کا موقع ملتا رہتا ہے، تاہم اس ادارے میں بچوں کی شاندار پرفارمنس دیکھ کر بے حد خوشی ہوئی۔ڈاکٹر ابرار حسین ملک نے کہا کہ نجی شعبہ تعلیم پاکستان کی تعلیمی ترقی میں اہم کردار ادا کر رہا ہے اور پاکستانی بچے دنیا کے ذہین اور باصلاحیت بچوں میں شمار ہوتے ہیں۔ انہوں نے کہا کہ اے اور او لیول میں نمایاں کامیابیاں حاصل کرنے والے طلبہ بھی پاکستانی ہیں جبکہ تلاوتِ کلامِ پاک کے عالمی مقابلوں میں بھی پاکستانی بچے نمایاں پوزیشنز حاصل کرتے ہیں۔ ان کا کہنا تھا کہ پاکستان میں ٹیلنٹ کی کوئی کمی نہیں، ہر شعبے میں پاکستانی قوم اپنی صلاحیتوں کا لوہا منوا رہی ہے جو ہمارے لیے باعثِ فخر ہے۔انہوں نے سکول کے ڈائریکٹر ذوالفقار احمد کی کاوشوں کو بھی سراہتے ہوئے کہا کہ ادارے میں ان کی محنت واضح طور پر نظر آ رہی ہے۔سکول کی پرنسپل کنول ملک نے خطبہ استقبالیہ میں مہمانِ خصوصی ڈاکٹر ابرار حسین ملک کو خوش آمدید کہا اور تقریب کے شرکاء والدین،اساتذہ اور بچوں کا شکریہ ادا کرتے ہوئے تعلیمی ترقی میں سکول کے فعال کردار کا عزم دہرایا۔ بعد ازاں مہمانِ خصوصی ڈاکٹر ابرار حسین ملک نے پرنسپل کنول ملک کے ہمراہ اساتذہ اورطلبہ میں سرٹیفکیٹس اور شیلڈز تقسیم کیں۔