بیجنگ : سی پی سی سینٹرل کمیٹی کے سیاسی بیورو کے رکن اور چینی وزیر خارجہ وانگ ای نے بیجنگ میں آسٹریلیا کی وزیر خارجہ پینی وونگ کے ساتھ چین-آسٹریلیا سفارتی اور اسٹریٹجک ڈائیلاگ کے آٹھویں دور کا انعقاد کیا۔ فریقین نے مشرق وسطیٰ کی صورتحال سمیت دیگر مسائل پر بھی تبادلہ خیال کیا۔جمعرات کے روز چینی میڈیا کے مطابق وانگ ای نے کہا کہ چین دونوں ممالک کے رہنماؤں کے درمیان طے پانے والے اہم اتفاق رائے کو عملی جامہ پہنانے، دوطرفہ تعلقات کے مثبت رجحان کو مستحکم کرنے اور جامع تزویراتی شراکت داری کو صحیح معنوں میں آگے بڑھانے کے لیے آسٹریلیا کے ساتھ مل کر کام کرنے کے لیے تیار ہے۔ صدر شی جن پھنگ کی جانب سے پیش کردہ چار گلوبل انیشی ایٹوز اور انسانیت کے ہم نصیب معاشرے کا تصور دنیا بھر کے ممالک کی خواہشات کے عین مطابق ہے اور بنی نوع انسان کے مفاد میں ہے۔ چین اور آسٹریلیا کو ایک زیادہ منصفانہ اور معقول گلوبل گورننس سسٹم کی تعمیر کے لیے مل کر کام کرنا چاہیے۔ چینی وزیر خارجہ نے تائیوان کے معاملے پر چین کے موقف کی وضاحت بھی کی۔ آسٹریلیا کی وزیر خارجہ نے کہا کہ آسٹریلیا چین کے ساتھ اپنے تعلقات کو فروغ دینے کے لیے پرعزم ہے اور ون چائنا پالیسی پر عمل پیرا ہے۔ آسٹریلیا چین کے ساتھ مل کر بین الاقوامی ضوابط کی حفاظت کرنے اور توانائی کی سلامتی کو یقینی بنانےکے لئے تیار ہے تاکہ عالمی امن، استحکام اور خوشحالی کو فروغ دیا جائے۔
