اسلام آباد (شِنہوا) اسلام آباد میں اپریل کی سنہری دوپہر کو جہاں بہار کی ہوا میں یاسمین اور جیکرانڈا کے پھولوں کی خوشبو رچی بسی تھی، فن اور ثقافت کے اہم مرکز پاکستان نیشنل کونسل آف دی آرٹس میں ایک رنگا رنگ تقریب منعقد ہوئی۔یہ کوئی عام اجتماع نہیں تھا، یہ 2 قدیم تہذیبوں کے درمیان ایک رابطہ تھا، پاکستان اور چین کی دوستی کا جشن جو قہقہوں، رنگوں اور تجسس سے بھرے نوجوان دلوں سے مزین تھا اور دونوں ممالک کے درمیان سفارتی تعلقات کے قیام کی 75ویں سالگرہ کی ایک یادگار تھا۔اس تقریب میں تقریباً 500 افراد نے شرکت کی جن میں پاکستان کے سرکاری حکام، پاکستان میں چینی سفارتی مشنز کے نمائندے، بیرون ملک مقیم چینی برادری کے رہنما اور دونوں ممالک کے اساتذہ، معلمین اور طلبہ شامل تھے۔روشن آنکھوں والی 10سالہ پاکستانی بچی سارہ بتول نے اپنے ہاتھوں میں ایک چھتری تھامے ہوئے تھی جس پر سرخ اور سبز رنگ کے دونوں ممالک کے جھنڈے بنے ہوئے تھے۔ اس کا سبز اور سفید لباس پرچم کی طرح لہرا رہا تھا۔بتول نے جوش و خروش سے کہا کہ میں یہاں گالا سےمحظوظ ہونے اور اپنے چینی دوستوں سے ملنے آئی ہوں۔ ہر سال ہم یہاں آتے ہیں اور دوست بناتے ہیں، ان کی (چینی) زبان اور ثقافت کو سمجھنے کی کوشش کرتے ہیں۔راولپنڈی سے تعلق رکھنے والی سکول ٹیچر آمنہ انور نے کہا کہ بچوں کے چہروں پر خوشی ناقابل بیان ہے۔ پاکستانی بچوں کے خوبصورت اور رنگین لباس، سکارف اور کڑھائی والے واسکٹ دیکھیں اور چینی بچوں کا روایتی لباس چھی پاؤ اور ہانفو نے اس محفل کو بہت خاص اور دلکش بنا دیا۔اپنے خطاب میں وفاقی پارلیمانی سیکرٹری برائے وزارت قومی ورثہ و ثقافت فرح ناز اکبر نے گزشتہ 75 برسوں کے دوران پاکستان اور چین کے درمیان پائیدار اور مضبوط دوستی کو بھرپور خراج تحسین پیش کیا۔انہوں نے نوجوانوں کے ثقافتی تبادلے کی سرگرمیوں کی اہمیت کو اجاگر کرتے ہوئے کہا کہ بچے پاکستان اور چین کی دوستی کا مستقبل اور امید ہیں۔ انہوں نے کہا کہ بچوں کی معصومیت اور گرمجوشی سے بھرپور اس تقریب نے دونوں ممالک کے درمیان ثقافتی روابط میں نئی روح پھونک دی ہے۔چینی امور کے بارے میں وزیراعظم کے خصوصی نمائندے ظفرالدین محمود نے کہا کہ چینی ثقافت قدیم، منفرد اور پاکستانی نوجوانوں کے لئے قابل مطالعہ اور قابل فہم ہے۔اس موقع پر پاکستان میں چینی ایجوکیشن ایسوسی ایشن کے صدر مابن نے کہا کہ دونوں ممالک کے درمیان سفارتی تعلقات کے قیام کے 75 برسوں کے دوران ثقافتی تبادلے اور عوامی سطح کے روابط دوستانہ تعلقات کی مضبوط بنیاد رہے ہیں۔انہوں نے کہا کہ یہ گالا دونوں ممالک کے مختلف شعبوں سے تعلق رکھنے والے 500 افراد اور نوجوانوں کو اکٹھا کر کے دو طرفہ ثقافتی تبادلے کا ایک پلیٹ فارم بنانے کے لئے منعقد کیا گیا تاکہ دونوں ممالک کے بچے ایک دوسرے کو بہتر طور پر سمجھ سکیں اور فن کے مظاہروں کے ذریعے اپنی دوستی کو مزید مضبوط بنا سکیں۔پاکستان میں چینی سفارت خانے کے ثقافتی اتاشی چھین پینگ نے کہا کہ سفارت خانہ چینی اور پاکستانی نوجوانوں کے درمیان ثقافتی اور تعلیمی تبادلوں کو مزید گہرا کرتا رہے گا۔انہوں نے کہا کہ چین عوامی سطح پر دوستانہ سرگرمیوں کی بھرپور حمایت کرتا ہے، باہمی افہام و تفہیم کی بنیاد کو مسلسل مضبوط بناتا ہے اور چین اور پاکستان کے درمیان سدابہار تزویراتی تعاون پر مبنی شراکت داری کی مستحکم اور طویل مدتی ترقی کو فروغ دیتا ہے۔یہ تقریب پاکستان میں چینی ثقافتی مرکز کے زیر اہتمام چینی ایجوکیشن ایسوسی ایشن اور چینی سٹوڈنٹس ایسوسی ایشن کےاشتراک سے منعقد ہوئی۔ اس موقع پر نوجوانوں کے لئے مضمون نویسی کے مقابلوں اور کلاسیکی تقاریر کے مقابلوں کی انعامی تقاریب بھی منعقد کی گئیں۔
