اسلام آباد(نیوزڈیسک)صدر آصف علی زرداری سے مسجد ِنبوی کے امام ڈاکٹر صلاح بن محمد نے ملاقات کی ،
اس موقع پر صدر مملکت نے کہا کہ مسلم امہ کو درپیش چیلنجز پر قابو پانے کیلئے مسلم ممالک کے درمیان مزید اتحاد اور تعاون کی ضرورت ہے ،
پاکستان اور سعودی عرب کے درمیان مشترکہ عقیدے، تاریخ اور بھائی چارے پر مبنی بہترین تعلقات ہیں، دونوں برادر ممالک کے درمیان تعلقات مزید مستحکم ہو رہے ہیں،
صدرمملکت نے دوطرفہ تعلقات مزید فروغ دینے کے پاکستان کے عزم کا اعادہ کیا۔
صدر آصف زرداری نے کہا کہ دونوں برادر ممالک کو مزید قریب لانے کے لیے ثقافتی اور عوام کے درمیان تعلقات فروغ دینے کی ضرورت ہے ، سعودی عرب قریبی دوست ہے ، پاکستان ہمیشہ سعودی عرب کے ساتھ کھڑا رہے گا،
امام مسجد نبوی ڈاکٹر صلاح بن محمدنے کہا کہ سعودی عرب کی قیادت اور عوام پاکستان کے ساتھ تعلقات کو بہت اہمیت دیتے ہیں،
پاکستان اور سعودی عرب کی مضبوط شراکت داری ہے ،دونوں ممالک کو عالم اسلام کو درپیش چیلنجز سے نمٹنے کے لیے مل کر کام کرنا چاہیے،
ڈاکٹر صلاح بن محمد نے سعودی عرب کی ترقی میں پاکستانی کمیونٹی کے کردار کو سراہا۔
امام مسجد نبوی نے کہا کہ شہزادہ محمد بن سلمان کی شروع کردہ اصلاحات سے سعودی عرب میں مزید ترقی اور خوشحالی آئے گی،
صدر مملکت نے شہزادہ محمد بن سلمان کی جرات مندانہ اور دور اندیش قیادت کو سراہا اور کہا کہ امید ہے کہ مسجد نبوی ﷺکے امام کے دورے سے دوطرفہ تعلقات کو مزید فروغ ملے گا،
مسجد نبوی ﷺ کے امام نے پاکستان کی سلامتی اور خوشحالی کے لیے دعا کی۔
قبل ازیں مسجد نبوی کے امام فضیلۃ الشیخ ڈاکٹر صلاح بن محمد البدیر 7 روزہ خیرسگالی دورہ پر پاکستان پہنچ گئے۔
تفصیلات کے مطابق وفاقی وزیر چوہدری سالک حسین، سعودی سفیر نواف سعید المالکی، سیکرٹری مذہبی امور ذوالفقار حیدر نے معزز مہمان کا استقبال کیا ۔
اس موقع پر میڈیا سے گفتگو کرتے ہوئے وفاقی وزیر چوہدری سالک حسین نے کہا کہ معزز مہمان کی پاکستان آمد باعث رحمت و برکت ہے، امام مسجد نبوی کی پاکستان آمد پوری قوم کیلئے باعثِ مسرت ہے،
چوہدری سالک حسین نے کہا کہ مسجد نبوی کے امام فیصل مسجد میں نماز جمعہ کی امامت کریں گے، ڈاکٹر صلاح بن محمد البدیر صدر مملکت، وزیراعظم اور آرمی چیف سے ملاقاتیں بھی کریں گے،
امام مسجد نبوی الشیخ ڈاکٹر صلاح البدیر جید پاکستانی علمائے کرام سے ملاقاتیں بھی کریں گے،
