بیجنگ :شنگھائی ٹیلی ویژن فیسٹیول کے 31ویں میگنولیا ایوارڈز کے فاتحین کا اعلان کر دیا گیا ہے۔ چائنا میڈیا گروپ کے سی سی ٹی وی-9 کی دستاویزی فلم "کرنسی کی کہانی” کو "تنظیمی کمیٹی کے خصوصی ایوارڈ” سے نوازا گیا ہے۔چین اور فرانس کی مشترکہ کاوش سے تیار کی گئی اس دستاویزی فلم میں کرنسی کے تہذیبی ارتقا کی تاریخ کا جائزہ لیا گیا ہے۔ فلم کی تیاری کے دوران دس سے زائد ممالک میں واقع آثارِ قدیمہ کے مقامات پر تحقیق کی گئی، جہاں مختلف تہذیبوں کے درمیان تبادلۂ فکر اور باہمی سیکھنے کی دلچسپ داستانوں کو بیان کیا گیا ہے، جبکہ عالمی معاشی نظام کی تشکیل میں چینی تہذیب کے اہم کردار کو بھی اجاگر کیا گیا ہے۔چار اقساط پر مشتمل یہ دستاویزی فلم ہزاروں برس کی تاریخ کا احاطہ کرتی ہے۔ فلم ساز ٹیم نے چین، فرانس، یونان، امریکہ، بولیویا اور دیگر ممالک کا دورہ کیا، دنیا کے اہم آثارِ قدیمہ کے مقامات کا جائزہ لیا اور 30 سے زائد عالمی شہرت یافتہ ماہرین سے گفتگو کی۔ آثارِ قدیمہ کی دریافتوں، تاریخی نوادرات پر تحقیق اور تاریخی مقامات کو بنیاد بناتے ہوئے یہ بتایا گیا ہے کہ کرنسی نے تہذیبوں کی تشکیل، باہمی روابط کے فروغ اور دنیا کی تاریخ کو کس طرح متاثر کیا۔اس دستاویزی فلم کے چینی، فرانسیسی اور انگریزی سمیت متعدد زبانوں میں ایڈیشن جاری کیے گئے۔ فرانس اور جرمنی کے مشترکہ عوامی ٹیلی ویژن چینل "آرٹے” پر نشر ہونے کے بعد اسے تقریباً 14 لاکھ ناظرین نے دیکھا، جبکہ ویب سائٹ اور یوٹیوب پر اس کے مجموعی ویوز کی تعداد 40 لاکھ سے تجاوز کر چکی ہے۔ اس کے علاوہ یہ دستاویزی فلم متعدد ممالک اور خطوں میں بھی ریلیز کی جا چکی ہے۔