برلن : چین کی وزارتِ تجارت کے زیرِ اہتمام "مشترکہ وسیع مارکیٹ، ایکسپورٹ ٹو چائنا” کے عنوان سے جرمنی کی خصوصی تقریب برلن میں منعقد ہوئی۔تقریب کے دوران جرمن کمپنیوں کو چینی مارکیٹ اور چائنا انٹرنیشنل امپورٹ ایکسپو کے پلیٹ فارم سے متعلق تفصیلی معلومات فراہم کی گئیں، تاکہ مزید معیاری جرمن مصنوعات اور خدمات کو چینی منڈی تک رسائی حاصل ہو سکے۔جرمنی میں منعقد ہونے والی یہ تقریب ایکسپورٹ ٹو چائنا” پروگرام کے تحت یورپی یونین میں ہونے والی پہلی سرگرمی تھی۔ اس میں مصنوعات سازی، طب و صحت کے شعبے اور دیگر صنعتوں سے تعلق رکھنے والی تقریباً 20 کمپنیوں اور تجارتی تنظیموں نے شرکت کی۔تقریب کے منتظمین میں شامل جرمن چیمبر آف کامرس اینڈ انڈسٹری نے کہا کہ بہت سی جرمن کمپنیاں طویل عرصے سے چین میں کاروبار کر رہی ہیں اور چینی منڈی ان کی عالمی کاروباری حکمتِ عملی کا ایک اہم حصہ بن چکی ہے۔ جرمن چیمبر آف کامرس اینڈ انڈسٹری میں امور چین کے سربراہ تھامس کونیگ نے کہا کہ اس وقت تقریباً 5200 جرمن کمپنیاں چین میں سرگرم ہیں اور ان میں سے بہت سی کئی دہائیوں سے وہاں سرمایہ کاری اور کاروبار کر رہی ہیں۔انہوں نے کہا کہ چین جرمن کمپنیوں کے لیے صرف ایک مارکیٹ نہیں بلکہ ان کی ترقی اور کاروباری سرگرمیوں کا ایک اہم مرکز بھی ہے۔ ایسے تبادلہ خیال کے پلیٹ فارم دونوں فریقوں کے لیے انتہائی اہمیت رکھتے ہیں۔