بیجنگ :چین کی قومی عوامی کانگریس کی مجلس قائمہ کے چیئرمین چاؤ لہ جی نے قازق پارلیمان کے ایوانِ زیریں کے اسپیکر یرلان کوشانوف کی دعوت پر قازقستان کا باضابطہ دوستانہ دورہ کیا۔جمعرات کے روز دورے کے دوران انہوں نے آستانہ میں قازق صدر قاسم جومارت توکایف سے ملاقات کی، جبکہ پارلیمان کے ایوانِ بالا کے چیئرمین مولن اشیمبایف اور ایوانِ زیریں کے اسپیکر یرلان کوشانوف سے الگ الگ مذاکرات بھی کیے۔ صدر توکایف سے ملاقات میں چاؤ لہ جی نے کہا کہ صدر شی جن پھنگ اور صدر توکایف کی اسٹریٹجک رہنمائی اور ذاتی دلچسپی کے باعث چین اور قازقستان کے تعلقات نے غیر معمولی ترقی کی ہے اور دونوں ممالک کے تعلقات مستقل جامع اسٹریٹجک شراکت داری کی اعلیٰ سطح تک پہنچ چکے ہیں۔ انہوں نے کہا کہ چین قازقستان کے ساتھ بنیادی مفادات سے متعلق معاملات میں مضبوط باہمی حمایت جاری رکھنے، ترقیاتی حکمتِ عملیوں میں ہم آہنگی بڑھانے اور بیلٹ اینڈ روڈ انیشی ایٹو کی اعلیٰ معیار کی مشترکہ تعمیر کو مزید آگے بڑھانے کا خواہاں ہے۔چاؤ لہ جی نے کہا کہ سرمایہ کاری، توانائی، معدنیات اور رابطہ کاری کے شعبوں میں تعاون کو مزید مستحکم کیا جائے گا، جبکہ نئی توانائی، ڈیجیٹل معیشت، مصنوعی ذہانت، سرحد پار ای کامرس اور اسمارٹ شہروں جیسے شعبوں میں تعاون کے نئے مواقع پیدا کیے جائیں گے۔انہوں نے دونوں ممالک کے درمیان "چین۔قازقستان ثقافتی تبادلہ سال” کو کامیاب بنانے اور کثیرالجہتی فریم ورک کے تحت قریبی تعاون جاری رکھنے پر بھی زور دیا تاکہ دونوں ممالک کے مشترکہ مفادات اور بین الاقوامی انصاف و مساوات کا تحفظ کیا جا سکے۔ملاقات کے بعد صدر توکایف نے چاؤ لہ جی کو اعلیٰ اعزاز "تمغہ دوستی” سے نوازا۔دورے کے دوران چاؤ لہ جی نے آستانہ میں چائنا نیشنل پیٹرولیم کارپوریشن سینٹرل ایشیا اینڈ رشیا کمپنی اور یوریشین نیشنل یونیورسٹی لوبان ورکشاپ کا بھی دورہ کیا۔