ایران میں امریکی و اسرائیلی حملے، تعلیمی و طبی ڈھانچے کو شدید نقصان

تہران :ایرانی ہلالِ احمر کے حکام نے بتایا ہے کہ امریکہ اور اسرائیل کے حملوں کے نتیجے میں ملک بھر میں بڑے پیمانے پر انفراسٹرکچر کو نقصان پہنچا ہے، جس میں تعلیمی، طبی اور امدادی ادارے شامل ہیں۔ حکام کے مطابق اب تک ایران میں مجموعی طور پر 22 ہزار 810 تجارتی مراکز متاثر ہوئے ہیں، جبکہ 322 طبی و صحت مراکز، 763 اسکول، 18 سائنسی و جامعاتی ادارے اور 20 ہلالِ احمر مراکز کو نقصان پہنچا ہے۔ اس کے علاوہ ہنگامی امدادی وسائل بھی متاثر ہوئے، جن میں 3 ہیلی کاپٹر، 46 ایمبولینسیں اور 48 امدادی گاڑیاں شامل ہیں۔ بیان میں مزید کہا گیا ہے کہ ان حملوں کے نتیجے میں 4 ہلالِ احمر کے امدادی کارکن اور 2 حاملہ خواتین جاں بحق ہوئیں، جبکہ 18 امدادی اہلکار زخمی ہوئے۔ طبی عملے میں بھی 24 افراد کی ہلاکت اور 116 کے زخمی ہونے کی اطلاعات ہیں۔ حکام کے مطابق حملوں سے خوزستان صوبہ میں پیٹروکیمیکل تنصیبات، شلمچہ سرحدی گزرگاہ، شہید بہشتی یونیورسٹی کی سائنسی تجربہ گاہیں اور شہری رہائشی علاقے بھی متاثر ہوئے ہیں۔