بیجنگ :چین کے وزیرخارجہ وانگ ای نے پاکستان کے نائب وزیراعظم اور وزیرخارجہ محمد اسحاق ڈار کے ساتھ ملاقات کی ۔بدھ کے روز چینی میڈیا کے مطابق فریقین نے موجودہ بین الاقوامی اور علاقائی تنازعات پر تفصیلی تبادلہ خیال کیا۔وانگ ای نے کہا کہ پاکستان نے حال ہی میں اسلام آباد میں چار فریقی وزرائے خارجہ کے اجلاس کی میزبانی کی ہے اور اب اسحاق ڈار بیجنگ کا دورہ کر رہے ہیں تاکہ مشرق وسطیٰ میں کشیدگی کو کم کرنے کے طریقوں پر تبادلہ خیال کیا جا سکے۔ چین اس دورے کا خیر مقدم کرتا ہے۔ وانگ ای نے کہا کہ پاکستان نے امن کے فروغ اور جنگ کے خاتمے کے لیے ثالثی سمیت جو کوششیں کی ہیں ، وہ خطے اور دنیا بھر میں امن کے تحفظ کے عزم کا مظہر ہیں ۔چین اور پاکستان کے درمیان اہم بین الاقوامی اور علاقائی مسائل پر بروقت تزویراتی رابطے اور سٹریٹجک تعاون کو مزید گہرا کرنا چین اور پاکستان کے ہم نصیب معاشرے کا اہم حصہ ہے ۔ چین کشیدگی کو کم کرنے اور امن مذاکرات کی بحالی میں پاکستان کے منفرد اور اہم کردار کی حمایت کرتا ہے ۔انہوں نے کہا کہ چین مشکلات پر قابو پانے، مداخلت کے خاتمے، جنگ کو جلد از جلد ختم کرنے، امن کے مواقع پیدا کرنے اور امن مذاکرات کے لیے ایک راستہ نکالنے کے لیے پاکستان کے ساتھ مل کر کام کرنے کو تیار ہے۔وانگ ای نے کہا کہ اس سال چین اور پاکستان کے درمیان سفارتی تعلقات کے قیام کی پچھترویں سالگرہ منائی جا رہی ہے۔ دونوں فریقوں کو دونوں ممالک کے رہنماؤں کے درمیان طے پانے والے اہم اتفاق رائے کو عملی جامہ پہنانا چاہیے، اعلیٰ سطحی تبادلوں کو قریب لانا چاہیے، اسٹریٹجک باہمی اعتماد کو گہرا کرنا چاہیے، عملی تعاون کو وسعت دینی چاہیے اور چین- پاکستان ہم نصیب معاشرے کی تعمیر کو مسلسل آگے بڑھانا چاہیے۔محمد اسحاق ڈار نے قومی عوامی کانگریس اور چینی عوامی سیاسی مشاورتی کانفرنس کے دو اجلاسوں کے کامیاب اختتام اور پندرہویں پانچ سالہ منصوبے کے خاکے کو اپنانے پر چین کو مبارکباد پیش کی اور اس یقین کا اظہار کیا کہ چین یقینی طور پر اس سے بھی بڑی کامیابی حاصل کرے گا۔ اسحاق ڈار نے کہا کہ پاکستان چین سفارتی تعلقات کے قیام کی پچھترویں سالگرہ کے موقع سے فائدہ اٹھاتے ہوئے چین کے ساتھ تاریخی دوستی کو آگے بڑھانے، جامع تعاون کو گہرا کرنے اور پاک چین چار موسموں کی اسٹریٹجک شراکت داری کو مسلسل فروغ دینے کا خواہاں ہے۔انہوں نے کہا کہ پاکستان ،ایران کی صورتحال پر پاکستان کی ثالثی کی کوششوں میں چین کی حمایت پر شکریہ ادا کرتا ہے۔