بیجنگ : چین کے وزیر خارجہ وانگ ای نے، درخواست پر، فرانسیسی صدر کے خارجہ امور کے مشیر، ایمانوئل بون کے ساتھ ٹیلی فون پر مشرق وسطیٰ کی صورت حال پر تبادلہ خیال کیا۔
ہفتہ کے روز ایمانوئل بون نے ایران اور لبنان سمیت مشرق وسطیٰ کی موجودہ صورتحال پر اپنے خیالات کا اظہار کرتے ہوئے کہا کہ فرانس اور چین بڑی طاقتیں ہیں، دونوں اقوام متحدہ کی مرکزیت کے نظام کی حمایت کرتے ہیں، بین الاقوامی قوانین کی پاسداری کرتے ہیں اور اختلافات کو بات چیت کے ذریعے حل کرنے کے حامی ہیں۔ دونوں ممالک کو مشرق وسطیٰ میں موجود کشیدگی کو کم کرنے اور مذاکرات دوبارہ شروع کرنے کے لیے مل کر کام کرنا چاہیے۔
انہوں نے کہا کہ فرانس اس سلسلے میں چین کے ساتھ رابطے اور تعاون کو مضبوط بنانے کے لیے تیار ہے تاکہ مشرق وسطیٰ میں امن اور استحکام کے جلد از جلد حصول کو ممکن بنایاجا سکے۔
وانگ ای نے چین کے موقف کی وضاحت کرتے ہوئے کہا کہ مشرق وسطیٰ کی موجودہ صورتحال بگڑتی جا رہی ہے، تنازعات کا پھیلاؤ بڑھتا جا رہا ہے ، جس سے نہ صرف عالمی توانائی کی فراہمی کے استحکام پر اثر پڑ رہا ہے بلکہ ایک بہت بڑا انسانی بحران بھی پیدا ہو رہا ہے۔ان کا کہنا تھا کہ طاقت سے کوئی بھی مسئلہ حل نہیں ہو سکتا۔ موجودہ نازک صورتحال کا سامنا کرتے ہوئے، فوری ترجیحات یہ ہونی چاہئیں ۔ سب سے پہلے، تنازع کے پھیلاؤ اور دوسرے ممالک کی اس میں شمولیت کو روکنا؛ دوسرا، بین الاقوامی برادری کی جانب سے فوری جنگ بندی کے لیے متفقہ کال جاری کرنا اور امن مذاکرات کو فروغ دینے کی کوششوں میں اضافہ کرنا؛ اور تیسرا، اقوام متحدہ اور سلامتی کونسل کا علاقائی امن اور استحکام کی جلد بحالی کو فروغ دینے میں اپنا بھرپور کردار ادا کرنا۔