بیجنگ :چین میں پاکستان کے سفیر خلیل ہاشمی نے بیجنگ میں چینی میڈیا کے ساتھ ایک انٹرویو کے دوران چین کے دو اجلاسوں، 15ویں پانچ سالہ منصوبے اور رواں ہفتے پیش کی گئی حکومتی ورک رپورٹ کے بارے میں اپنے خیالات کا اظہار کیا۔
ہمہ گیر عوامی طرز جمہوریت کے بارے میں ہاشمی نے کہا کہ یہ جامع، عوام پر مبنی مشاورتی عمل ملک کے نظام حکومت میں ایک مرکزی حیثیت رکھتا ہے جس نے انسانی تاریخ میں اب تک کے سب سے کم وقت میں قابل ذکر ترقیاتی نتائج فراہم کئے ہیں ۔ انہوں نے اس بات پر روشنی ڈالی کہ چین کا پانچ سالہ منصوبہ ایک اہم منصوبہ بندی کا خاکہ ہے جو اس کے گورننس فریم ورک کے اندر تسلسل، لچک، پیشن گوئی اور استحکام کی نمائندگی کرتا ہے۔
انھوں نے اس بات پر بھی زور دیا کہ چین کے 15 ویں پانچ سالہ منصوبے میں بیان کردہ منصوبے اور ترجیحات پاکستان کے قومی اقتصادی تبدیلی کے منصوبے – اڑان پاکستان کے ساتھ ہم آہنگ ہیں۔ دونوں ممالک زراعت، سائنس و ٹیکنالوجی، آئی سی ٹی، تعلیم ، اے آئی اور ڈیجیٹل ڈیولپمنٹ کو آگے بڑھانے کے لیے تعاون اور ہم آہنگی پر مبنی مشترکہ کوششیں کر رہے ہیں۔
پاکستان اور چین کے درمیان سفارتی تعلقات کی 75ویں سالگرہ کی اہمیت پر تبصرہ کرتے ہوئے سفیر ہاشمی نے کہا کہ یہ سنگِ میل دونوں ممالک کے درمیان اس منفرد دوستی کے جشن کا موقع ہے جو وقت کی کسوٹی پر پوری اتری ہے اور مسلسل مزید مضبوط اور وسیع ہو رہی ہے۔