اسلام آباد:وزیرِ اعظم محمد شہباز شریف کی دعوت پر اردن کے شاہ عبداللہ دوم اپنے دو روزہ دورہ پر اسلام آباد پہنچ گئے، ہوائی اڈے پر صدر مملکت آصف علی زرداری، وزیرِ اعظم محمد شہباز شریف، وفاقی وزیر موسمیاتی تبدیلی مصدق ملک اور وزیرِ مملکت برائے تعلیم وجیہہ قمر نے شاہ عبداللہ دوم اور انکے اعلی سطحی وفد کا استقبال کیا۔
اردن کے شاہ عبداللہ دوم پاکستان کے دورہ پر ہفتہ کو اسلام آباد پہنچے ، شاہ عبداللہ دوم کا دورہ پاکستان، اردن اور پاکستان کے مابین دیرینہ برادرانہ تعلقات کی عکاسی کرتا ہے۔ یہ دورہ دونوں ممالک کے مابین سیاسی، اقتصادی اور ثقافتی تعلقات کی مزید مضبوطی کا باعث ہوگا۔شاہ عبداللہ دوم کچھ ہی دیر میں وزیرِ اعظم ہاؤس جائیں گے جہاں انہیں گارڈ آف آنر پیش کیا جائے گا۔
گارڈ آف آنر پیش
اردن کے شاہ عبداللہ دوم کا وزیراعظم ہاؤس آمد پر پرتپاک استقبال کیا گیا۔ وزیراعظم محمد شہباز شریف نے اردن کے شاہ عبداللہ دوم کا خیر مقدم کیا۔ دونوں رہنماؤں نے گرم جوشی سے مصافحہ کیا۔ ہفتہ کو شاہ عبداللہ دوم کی وزیراعظم ہاؤس آمد پر ان کے اعزاز میں پروقار استقبالیہ تقریب کا انعقاد کیا گیا۔ اس موقع پر دونوں ممالک کے قومی ترانے بجائے گئے۔ مسلح افواج کے چاق و چوبند دستے نے اردن کے شاہ عبداللہ دوم کو گارڈ آف آنر پیش کیا، شاہ عبداللہ دوم نے گارڈ آف آنر کا معائنہ کیا۔ وزیراعظم محمد شہباز شریف نے وفاقی کابینہ کے ارکان کا اردن کے شاہ عبداللہ دوم سے تعارف کرایا جبکہ اردن کے شاہ نے بھی اپنے وفد کے ارکان کو وزیراعظم محمد شہباز شریف سے متعارف کرایا۔ شاہ عبداللہ دوم نے وزیراعظم ہاؤس کے سبزہ زار میں پودا بھی لگایا۔