وزیر اعظم شہباز شریف چار ملکی دورے کے پہلے مرحلے میں ترکیہ روانہ

اسلام آباد: وزیر اعظم پاکستان محمد شہباز شریف چار ملکی سرکاری دورے کے پہلے مرحلے میں ترکیہ روانہ ہو گئے۔ ان کے ہمراہ نائب وزیر اعظم و وزیر خارجہ محمد اسحاق ڈار، وفاقی وزیر اطلاعات و نشریات عطا اللہ تارڑ اور معاون خصوصی طارق فاطمی بھی موجود ہیں۔
وزیر اعظم شہباز شریف 25 سے 30 مئی 2025 تک ترکی، ایران، آذربائیجان اور تاجکستان کے دورے پر رہیں گے۔ اس دورے کے دوران وہ متعلقہ ممالک کے رہنماؤں سے دو طرفہ تعلقات، علاقائی و عالمی امور اور باہمی دلچسپی کے دیگر معاملات پر بات چیت کریں گے۔
وزیر اعظم حالیہ پاک بھارت بحران کے دوران ان دوست ممالک کی جانب سے پاکستان کی حمایت پر ان کا شکریہ بھی ادا کریں گے۔

وزیر اعظم 29 اور 30 مئی کو تاجکستان کے دارالحکومت دوشنبے میں ہونے والی بین الاقوامی کانفرنس میں بھی شرکت کریں گے، جو گلیشیئرز اور ماحولیاتی تبدیلیوں کے موضوع پر منعقد کی جا رہی ہے۔