اسلام آباد:پاکستان مسلم لیگ کے سربراہ اور سابق وزیراعظم چوہدری شجاعت حسین نے قومی مفاہمت اور سیاسی جماعتوں سے رابطوں کے لیے قائم کی گئی کمیٹی میں ڈاکٹر محمد امجد،رضوان صادق خان کو بھی ممبر نامزد کردیا ہے، سابق وزیراعلی بلوچستان میر نصیر خان مینگل کی سربراہی میں بننے والی کمیٹی میں مصطفیٰ ملک وائس چیئرمین، طارق حسن، انتخاب خان، ڈاکٹر رحیم اعوان ممبران ہیں جبکہ اب ڈاکٹر امجد اور رضوان صادق کو بھی اس کمیٹی کا ممبر نامزد کیا گیا ہے۔
ڈاکٹر محمد امجد سابق وفاقی وزیر براِئے بین الصوبائی رابطہ اور پارٹی کے چیف آرگنائزر ہیں جب کہ ان کا سیاسی سماجی شعبے میں وسیع تجربہ ہے ، رضوان صادق خان راولپنڈی/ اسلام آباد کے ممتاز کٹھڑ قبیلہ سے تعلق رکھتے ہیں وہ پارٹی ٹکٹ پر قومی اسمبلی کے الیکشن میں حصہ لے چکے ہیں جبکہ عسکری، کاروباری اداروں، سیاسی جماعتوں میں گہرے ذاتی اثر رسوخ کے حامل ہیں، کمیٹی کا پہلا باقاعدہ اجلاس اتوار کو طلب کیا گیا ہے جس میں کمیٹی چوہدری شجاعت حسین کی ہدایات کی روشنی میں اپنا لائحہ عمل اور سفارشات تیار کرے گی۔