اسلام آباد:پاک بحریہ اور رائل سعودی نیول فورسز کے مابین دوطرفہ میری ٹائم مشق نسیم البحر کے سلسلے کی پندرہویں مشق شمالی بحیرہ عرب میں فائر پاور کے مظاہرے کے ساتھ اختتام پذیر ہو گئی۔
کمانڈر رائل سعودی نیول فورسز اس موقع پر مہمان خصوصی تھے ، چیف آف دی نیول اسٹاف ایڈمرل نوید اشرف نے بھی مہمان خصوصی کے ساتھ میزائل فائرنگ کا مظاہرہ دیکھا۔
ترجمان پاک بحریہ کے مطابق پاکستان نیوی کے بحری جہازوں پی این ایس ذوالفقار اور پی این ایس یرموک کے ہمراہ رائل سعودی نیول فورسز کے جہازوں جزان اور حائل نے زمین سے سطح زمین اور فضا میں ہدف کو نشانہ بنانے والے میزائل فائر کیے اور اپنے اہداف کو کامیابی سے نشانہ بناتے ہوئے آپریشنل تیاری اور حربی صلاحیتوں کا شاندار مظاہرہ کیا۔
یہ مشق جدید بحری آپریشنز پر مشتمل تھی جس میں شریک دونوں بحری افواج کے جہازوں نے مشترکہ مشقیں کیں جن میں اینٹی سرفیس وارفیئر، اینٹی سب میرین وارفیئر اور مربوط میری ٹائم سیکیورٹی آپریشنز شامل تھے، مشق کے ذریعے باہمی ہم آہنگی، دو طرفہ تعاون میں اضافہ اور میری ٹائم سیکیورٹی کے لیے مشترکہ طور پر کام کرنے کے عزم کا اظہار کیا گیا۔
حال ہی میں اختتام پذیر ہونے والی کثیر القومی مشق امن 25 میری ٹائم سیکیورٹی کے لئے پاک بحریہ کے عزم کا اظہار ہے جبکہ مشق نسیم البحر XV میں فائر پاور کا مظاہرہ پاک بحریہ کی حربی صلاحیتوں اور آپریشنل تیاری کا مظہر ہے۔
مشق نسیم البحر ہر دو سال بعد منعقد کی جانے والی دو طرفہ آپریشنل مشق ہے جو اسٹریٹجک شراکت داری کو مستحکم کرنے کے ساتھ ساتھ مشترکہ بحری مفادات کے تحفظ کے لئے دونوں بحری افواج کے عزم کی عکاسی کرتی ہے۔