واشنگٹن: امریکی صدر بائیڈن نے کہا کہ سیاسی بیان بازی کافی حد تک بڑھ گئی ہے، سیاسی درجہ حرارت کم کرنے کی ضرورت ہے۔ شکر ہے ٹرمپ شدید زخمی نہیں ہوئے۔ سیاست میں کسی کی جان کو خطرہ نہیں ہونا چاہیے، اختلاف کا مطلب دشمنی نہیں ہونا چاہیے۔ اختلافات بیلٹ باکس کے ذریعے حل کرتے ہیں، گولی سے نہیں۔
اوول آفس سے خطاب میں جو بائیڈن نے کہا کہ معلوم نہیں کہ حملہ آور کا کیا مقصد تھا؟ اسے مدد حاصل تھی یا نہیں؟ امریکا میں اس قسم کے تشدد کی کوئی جگہ نہیں۔ صدارتی انتخاب میں خطرات بہت زیادہ ہیں۔ جمہوریت اور قانون کی بالادستی کے لیے آواز اٹھاتا رہوں گا۔
گزشتہ روز دیے گئے بیان میں جو بائیڈن نے کہا تھا کہ ٹرمپ پر حملے کی مکمل اور واضح تحقیقات کا حکم دیا ہے۔ نتائج سب کو بتائےجائیں گے ری پبلکن کنونشن کے سیکیورٹی اقدامات کے لیے سیکریٹ سروس کو ہدایات دے دی ہیں۔
یاد رہے کہ ہفتے کو امریکا کے سابق صدر ڈونلڈ ٹرمپ پر انتخابی ریلی کے دوران فائرنگ ہوئی جس سے وہ زخمی ہوئے، گولی ٹرمپ کے کان کو چھوتی ہوئی نکل گئی۔ فائرنگ سے ریلی میں شریک ایک شخص بھی ہلاک ہوا جبکہ حملہ آور کو بھی فوراً ہی مار دیا گیا۔