ایک چین کا اصول ناقابلِ تسخیر، ڈی پی پی کی”تائیوان کی آزادی” کی کوششوں کی ناکامی مقدر ہے،ماہرین

0

 

بیجنگ(شِنہوا)آبنائے تائیوان کے دونوں جانب کے ماہرین اور دانشوروں نے کہا ہے کہ چین اور امریکہ کے سربراہان مملکت کے درمیان حالیہ ملاقات اور چین، روس اور امریکہ کے سربراہ اجلاس نے ایک واضح پیغام دیا ہے کہ تائیوان کا معاملہ چین کے بنیادی مفادات کا مرکز ہے اور عالمی برادری کی ایک چین کے اصول سے وابستگی غیر متزلزل ہے۔
انہوں نے کہا کہ ڈیموکریٹک پروگریسو پارٹی (ڈی پی پی) کی انتظامیہ کی جانب سے بیرونی طاقتوں پر انحصار اور فوجی طاقت میں اضافے کے ذریعے "تائیوان کی آزادی” حاصل کرنے کی کوششیں ناکام ہوں گی۔
چینی صدر شی جن پھنگ نے امریکی صدر ڈونلڈ ٹرمپ سے ملاقات کی، جو 33ویں ایشیا بحرالکاہل اقتصادی تعاون (اپیک) کے رہنماؤں کے اجلاس میں شرکت کے لیے چین کے جنوبی شہر شین زین آئے ہوئے تھے۔ اسی روز شی جن پھنگ نے ٹرمپ اور روسی صدر ولادیمیر پوتن کے ساتھ ایک تاریخی سہ فریقی سربراہ اجلاس کی میزبانی بھی کی۔
ٹرمپ سے ملاقات کے دوران شی نے کہا کہ تائیوان کے معاملے پر امریکہ کو درست طرزِ عمل برقرار رکھنا چاہیے اور چین امریکہ تعلقات میں بڑی رکاوٹیں پیدا کرنے سے گریز کرنا چاہیے۔ اس موقع پر ٹرمپ نے کہا کہ امریکہ "تائیوان کی آزادی” کی حمایت نہیں کرتا۔
چائنیز اکیڈمی آف سوشل سائنسز کے زیرِ انتظام بیجنگ میں قائم انسٹی ٹیوٹ آف تائیوان اسٹڈیز کے محقق چھن گوئی چھنگ نے کہا کہ شی نے ایک بار پھر امریکہ کے سامنے تائیوان کے معاملے پر چین کا دوٹوک مئوقف واضح کیا ہے اور ساتھ ہی چین کی توقعات بھی بیان کی ہیں۔
چھن نے کہا کہ تائیوان کا معاملہ نہ صرف چین امریکہ تعلقات کے مجموعی استحکام بلکہ عالمی استحکام سے بھی تعلق رکھتا ہے۔ انہوں نے کہا کہ درست طرزِ عمل اختیار کرنے کا مطلب یہ ہے کہ امریکہ "تائیوان کارڈ” کھیلنا بند کرے اور "تائیوان کی آزادی” کے خواہاں علیحدگی پسند عناصر کو غلط اشارے دینے سے گریز کرے۔ بصورت دیگر دونوں ممالک کے درمیان مستحکم اور تعمیری تزویراتی تعلقات قائم کرنے کی کوششیں متاثر ہوں گی۔
شنگھائی انسٹی ٹیوٹ آف تائیوان اسٹڈیز کے ڈائریکٹر نی یونگ جی نے کہا کہ ٹرمپ کے صدارتی دور میں یہ پہلا موقع ہے کہ انہوں نے دونوں ممالک کے سربراہان مملکت کی ملاقات کے دوران عوامی سطح پر واضح کیا ہے کہ امریکہ "تائیوان کی آزادی” کی حمایت نہیں کرتا۔
نی نے کہا کہ یہ بیان تائیوان کے معاملے پر چین کے اہم تحفظات کے حوالے سے امریکہ کی جانب سے ایک جواب تھا۔
ماہرین نے کہا کہ دونوں رہنماؤں کی جانب سے تائیوان کے حوالے سے واضح کیے گئے مئوقف نے "تائیوان کی آزادی” کے خواہاں علیحدگی پسند عناصر کو ایک اور بڑا دھچکا پہنچایا ہے۔

Leave A Reply

Your email address will not be published.