پشاور: گورنر خیبرپختونخوا فیصل کریم کنڈی نے دیر کالونی سکول کی چھت گرنے کے افسوسناک واقعے کے مقام کا دورہ کیا اور جائے وقوعہ کا معائنہ کیا۔
اس موقع پر میڈیا سے گفتگو کرتے ہوئے گورنر فیصل کریم کنڈی نے کہا کہ دیر کالونی سکول حادثے پر ہر شہری افسردہ ہے، قیمتی انسانی جانوں کا ضیاع ناقابل تلافی نقصان ہے۔
انہوں نے کہا کہ واقعے کی تحقیقات کے لیے ٹیم تشکیل دے دی گئی ہے جو تمام پہلوؤں کا جائزہ لے رہی ہے، جبکہ حادثے میں جو بھی ذمہ دار پایا گیا اس کے خلاف قانون کے مطابق کارروائی عمل میں لائی جائے گی۔
گورنر فیصل کریم کنڈی نے کہا کہ سب سے پہلے یہ معلوم کیا جائے گا کہ سکول کو این او سی کس نے جاری کیا تھا، اس افسوسناک واقعے پر کسی قسم کا سمجھوتہ نہیں کیا جائے گا۔
انہوں نے اعلان کیا کہ حادثے میں جاں بحق افراد کے لواحقین کو 10، 10 لاکھ روپے جبکہ زخمیوں کو 2، 2 لاکھ روپے مالی امداد فراہم کی جائے گی۔
فیصل کریم کنڈی نے کہا کہ واقعے کی شفاف تحقیقات اور ذمہ داروں کا تعین ہر صورت یقینی بنایا جائے گا۔
مشیر تعلیم عامرعبداللہ، مشیر اطلاعات و پبلیک ریلیشنز ثمر ہارون بلوراورارباب زرک خان بھی اس موقع پر موجود تھے۔
