اقوام متحدہ :چین کے نائب صدر ہان زینگ نے نیویارک میں اقوام متحدہ کی جنرل اسمبلی میں شرکت کے موقع پر اقوام متحدہ کے سیکرٹری جنرل انتونیو گوتریس سے ملاقات کی، چین کے زیر اہتمام گلوبل ڈیولپمنٹ انیشی ایٹو کی 5ویں سالگرہ کے موقع پر اعلیٰ سطحی ڈائیلاگ کانفرنس میں شرکت کی اور اس موقع پرچینی صدر شی جن پھنگ کا تہنیتی خط پڑھ کر سنایا۔ اقوام متحدہ کی ڈپٹی سیکرٹری جنرل آمنہ محمد، پاکستانی وزیر اعظم شہباز شریف سمیت دیگر سیاست دانوں کے علاوہ 30 سے زائد ممالک کے وزارتی سطح کے حکام نیز 60 سے زائد ممالک اور 20 سے زائد بین الاقوامی تنظیموں کے 300 سے زائد نمائندوں نےکانفرنس میں شرکت کی۔ اقوام متحدہ کے سیکرٹری جنرل انتونیو گوتریس نے کہا کہ چین اقوام متحدہ کے اہم ایجنڈوں کو آگے بڑھانے میں کلیدی اور عالمی ترقی میں اہم کردار ادا کرتا ہے۔ اقوام متحدہ عالمی برادری کے مشترکہ مفادات کے تحفظ کے لیے چین کے ساتھ تعاون کو مزید گہرا کرنے کے لیے تیار ہے۔ گلوبل ڈیولپمنٹ انیشی ایٹو کی 5ویں سالگرہ کے موقع پر اعلیٰ سطحی ڈائیلاگ کانفرنس میں چینی نائب صدر نے کہا کہ گزشتہ پانچ سالوں کے دوران گلوبل ڈیولپمنٹ انیشی ایٹوایک چینی تصور سے مشترکہ بین الاقوامی اقدام میں تبدیل ہو گیا ہے، جس نے اقوام متحدہ کے پائیدار ترقی کے ایجنڈے 2030 کی تکمیل کے لئے چینی حل اور چینی قوت فراہم کی ہے۔ چین تمام فریقوں کے ساتھ مل کر اس انیشی ایٹو کو مزید گہرائی اور عملی طور پر آگے بڑھانے کے لیے کام کرنے کا خواہاں ہے، تاکہ ترقی کے ثمرات سے تمام ممالک کے لوگوں کو فائدہ پہنچے اور بنی نوع انسان کے ہم نصیب معاشرے کی تعمیر میں زیادہ سے زیادہ خدمات سرانجام دی جائیں۔ کانفرنس میں شریک تمام فریقین نے گزشتہ پانچ سالوں میں پائیدار ترقی کے حصول اور 2030 ایجنڈے کے نفاذ کو فروغ دینے میں ممالک کی مدد کرنے میں گلوبل ڈویلپمنٹ انیشی ایٹو کے اہم کردار کو بھرپورسراہا۔ انہوں نے کہا کہ یہ انیشی ایٹو عالمی ترقی کے لیے مضبوط قوت محرکہ فراہم کرتا ہے اور وہ اس انیشی ایٹو کی مضبوطی سے حمایت جاری رکھنے اور یکجہتی اور تعاون کو مضبوط بنانے کے لیے تیار ہیں۔
