بیجنگ :کمیونسٹ پارٹی آف چائنا کی مرکزی کمیٹی کے جنرل سیکرٹری، چین کے صدر اور مرکزی فوجی کمیشن کے چیئرمین شی جن پھنگ نے شنگھائی کے دورے کے دوران اس بات پر زور دیا کہ اعلیٰ معیار کی شہری تجدید ، شہری جدیدیت کو آگے بڑھانے کا ایک اہم محرک ہے۔
انہوں نے شہری تجدید کے تمام اقدامات مؤثر انداز میں نافذ کرنے اور عوام کو زیادہ سہولتیں، فوائد اور تحفظ کے احساس میں مسلسل اضافہ کرنے کی ضرورت پر زور دیا۔ شی جن پھنگ نے شنگھائی کے ہوانگ پو ڈسٹرکٹ میں واقع بان سونگ یوان روڈ کے شہری رہائشی علاقے کا دورہ کیا۔ انہوں نے کہا کہ پارٹی کی مرکزی کمیٹی شہری ترقی کے امور کو بے حد اہمیت دیتی ہے اور پرانے رہائشی علاقوں کی ازسرِنو تعمیر و تزئین اس کا اہم حصہ ہے۔ انہوں نے رہائشیوں کے اطمینان کو مدنظر رکھتے ہوئے کمیونٹی میں پراپرٹی مینجمنٹ اور عوامی سہولتوں کے معیار کو مسلسل بہتر بنانے پر زور دیا۔ دورے کے دوران صدر شی جن پھنگ نے ریٹائرڈ شہری جو گوولی کے گھر جا کر ان کی رہائشی سہولتوں کا جائزہ لیا۔ بعد ازاں انہوں نے کمیونٹی سروس اسٹیشن کا دورہ کیا، سہولت اسٹور میں پھلوں اور سبزیوں کی فراہمی کا معائنہ کیا، اور رہائشی نمائندوں، ذیلی ضلعی حکام اور کمیونٹی کارکنوں سے خوشگوار گفتگو کی۔ شی جن پھنگ نے اپنے دورے کے دوران اس بات پر بھی زور دیا کہ یہ وقت سیلاب کے خطرات کا ایک اہم مرحلہ ہے، لہٰذا تمام علاقوں اور متعلقہ اداروں کو سیلاب کی روک تھام، سیلاب سے نمٹنے اور قدرتی آفات سے بچاؤ کے اقدامات پوری سنجیدگی سے انجام دینے چاہییں تاکہ عوام کی جان و مال کا مؤثر تحفظ یقینی بنایا جا سکے۔
