بیجنگ :چین کے صدر شی جن پھنگ نے بیجنگ میں بیلاروس کے صدر الیگزینڈر لوکاشینکو سے ملاقات کی۔پیر کے روز ملاقات کے دوران صدر شی جن پھنگ نے کہا کہ چین اور بیلاروس باہمی اعتماد اور حمایت کرنے والے سچے دوست، مشترکہ ترقی اور خوشحالی کے اچھے شراکت دار اور ہمہ موسمی جامع اسٹریٹجک شراکت دار ہیں۔انہوں نے زور دیا کہ چین اور بیلاروس کو اسٹریٹجک روابط برقرار رکھنے چاہئیں، دوطرفہ تعلقات کو اعلیٰ سطح پر مسلسل آگے بڑھانا چاہیے اور دونوں ممالک کے عوام کی بہتر خدمت کرنی چاہیے۔ چین بیلاروس کی قومی خودمختاری، آزادی اور علاقائی سالمیت کے تحفظ، اور اپنے ملک کی صورتحال کے مطابق ترقی کے راستے پر چلنے کی حمایت کرتا ہے، اور بیلاروس کی ترقی و تعمیر میں مدد فراہم کرنے کے لیے تیار ہے۔ دونوں ممالک کو ہر طرح کے وسائل کو متحرک کرنا چاہیے، "بیلٹ اینڈ روڈ” کی تعمیر کو فروغ دینا چاہیے، اور عملی تعاون کو وسعت دینی چاہیے۔چین بیلا روس کے ساتھ مل کر انسانیت کے ہم نصیب معاشرے کی تشکیل کے لیے کام کرنے، چار عالمی اقدامات پر عمل درآمد کرنے، اقوام متحدہ اور شنگھائی تعاون تنظیم سمیت کثیر الجہتی اداروں میں ہم آہنگی اور تعاون مضبوط کرنے اور ایک غیر مستحکم دنیا میں استحکام کی قوت بننے کا خواہاں ہے۔لوکاشینکو نے کہا کہ بیلاروس چین کے ساتھ تعلقات کو بہت اہمیت دیتا ہے، اور چین کے ساتھ اسٹریٹجک روابط کو مضبوط بنانے، تعاون کے شعبوں کو وسعت دینے اور دونوں ممالک کے تعلقات کی مزید ترقی کو فروغ دینے کی توقع رکھتا ہے۔انہوں نے کہا کہ صدر شی جن پھنگ کی جانب سے پیش کردہ چار عالمی اقدامات نے عالمی مسائل کے سیاسی حل کو فروغ دیا ہے اور دنیا میں امن، استحکام اور خوشحالی کے لیے اہم کردار ادا کیا ہے۔
