بیجنگ :نویں چائنا یوریشیا ایکسپو کا آغاز سنکیانگ کے شہر ارومچی میں ہوا۔ چین کی ریاستی کونسل کے نائب وزیر اعظم ڈنگ شو ئے شیانگ نے ایکسپو کی افتتاحی تقریب میں شرکت کی اور خطاب کیا ۔ جمعرات کے روز انہوں نےکہا کہ چینی صدر شی جن پھنگ نے زور دیا ہے کہ شاہراہِ ریشم کے جذبے کو فروغ دیا جائے اور ایشیا و یورپ کے درمیان تعاون کی سطح کو مسلسل بہتر بنایا جائے۔ ہمیں اتحاد اور مشترکہ کوششوں کے ساتھ آگے بڑھتے ہوئے باہمی مفاد پر مبنی تعاون سے زیادہ نتائج حاصل کرنے چاہییں۔اس موقع پر انہوں نے چار تجاویز پیش کیں:پہلی یہ کہ ترقیاتی حکمتِ عملیوں کی ہم آہنگی کو مزید گہرا کیا جائے، پالیسی رابطے کو مضبوط بنایا جائے، اور مختلف ممالک کی ضروریات، مفادات کے مشترکہ نکات اور مستقبل کی ترقی کے مواقعوں کو درست طور پر تلاش کیا جائے۔دوسری یہ کہ اعلیٰ سطح کے کھلے پن کو مسلسل وسعت دی جائے، ٹیرف اور غیر ٹیرف رکاوٹوں کو کم کیا جائے، ادارہ جاتی کھلے پن کو بتدریج آگے بڑھایا جائے، اور علاقائی تجارتی تعاون کے لیے سازگار ماحول پیدا کیا جائے۔تیسری یہ کہ کثیر الجہتی اور مؤثر رابطہ جاتی نیٹ ورک قائم کیا جائے، بنیادی ڈھانچے کی "ہارڈ کنیکٹیویٹی ” اور قواعد و ضوابط اور معیار کی "سافٹ کنیکٹیویٹی ” کو مضبوط بنایا جائے، تاکہ افراد کی آمدورفت، ٹیکنالوجی کی منتقلی اور مالیاتی بہاؤ مزید آسان ہو سکے۔چوتھی یہ کہ ترقی کے نئے محرکات کو فروغ دیا جائے، نئی معیاری پیداواری قوتوں کے مواقعوں سے فائدہ اٹھایا جائے، سائنسی و تکنیکی جدت اور صنعتی جدت کے انضمام کو گہرا کیا جائے، اور زیادہ مضبوط اور لچکدار صنعتی و سپلائی چین تشکیل دی جائے۔ڈنگ شو ئےشیانگ نے یہ بھی کہا کہ چین ہمیشہ کی طرح سنکیانگ کی مقامی خصوصیات کے مطابق اعلیٰ معیار کی ترقی کے راستے کو فعال طور پر تلاش کرنے، سلک روڈ اکنامک بیلٹ کے بنیادی علاقے کی تعمیر کو تیز کرنے اور ملکی اور بین الاقوامی مارکیٹ کی دوہری گردش کو فروغ دینے میں زیادہ کردار ادا کرنے میں مدد کرے گا ۔افتتاحی تقریب میں قازقستان کے نائب وزیر اعظم سریک ژومانگارین ، کرغزستان کے نائب وزیر اعظم اکونبیکوف اور پاکستان کی قومی اسمبلی کے ڈپٹی اسپیکر غلام مصطفیٰ شاہ نے بھی شرکت کی اور خطاب کیا۔24 سے 25 تاریخ کے دوران ڈنگ شو ئے شیانگ نے بالترتیب ژومانگالین، اکونبیکوف اور غلام مصطفیٰ شاہ سے ملاقاتیں بھی کیں اور مشترکہ دلچسپی کے امور پر تبادلۂ خیال کیا۔
