ملک کے نامور علماء، محققین اور ماہرین تعلیم تفسیر قرآن کے مختلف پہلوؤں پر روشنی ڈالیں گے
اسلام آباد(خصوصی رپورٹر) معروف عالم دین اور محقق ڈاکٹرحبیب اللہ چشتی کی چار جلدوں پر مشتمل علمی و تحقیقی تصنیف ”تفسیر مطالبِ القرآن” کی تقریب رونمائی 7 جون 2026ء بروز اتوار دوپہر ایک بج کر تیس منٹ پر فیض احمد فیض آڈیٹوریم، اکادمی ادبیات پاکستان، اسلام آباد میں منعقد ہوگی۔تقریب کی صدارت سابق وزیر اور ممتاز مذہبی و سیاسی شخصیت پیر محمد امین الحسنات شاہ کریں گے جبکہ پیر محمد جنید انور شاہ مہمانِ خصوصی ہوں گے۔تقریب میں ملک کے ممتاز علماء کرام، ماہرینِ تعلیم، محققین اور دانشور تفسیرِ مطالبِ القرآن کے علمی، فکری اور عصری پہلوؤں پر اظہارِ خیال کریں گے۔ مقررین اس تصنیف کی قرآنی علوم، جدید تقاضوں سے ہم آہنگ تشریح، بین المذاہب ہم آہنگی، اسلامی تہذیب و تمدن اور سماجی اصلاح کے حوالے سے اہمیت کو اجاگر کریں گے۔منتظمین کے مطابق تفسیرِ مطالبِ القرآن ایک ایسی علمی کاوش ہے جو قرآنِ مجید کے پیغام کو عصرِ حاضر کے تقاضوں اور معاشرتی ضروریات کے تناظر میں پیش کرتی ہے۔ اس موقع پر دینی، علمی، ادبی اور سماجی حلقوں کی بڑی تعداد کی شرکت متوقع ہے۔تقریب کے اختتام پر شرکاء کو مصنف کی علمی خدمات اور تفسیر کی خصوصیات سے آگاہ کیا جائے گا جبکہ حاضرین کے لیے سوال و جواب کا خصوصی موقع بھی فراہم کیا جائے گا۔منتظمین نے علماء کرام، اساتذہ، طلبہ، محققین، دانشوروں،میڈیا نمائندگان اور قرآن فہمی سے دلچسپی رکھنے والے افراد کو تقریب میں شرکت کی دعوت دی ہے۔
