اسلام آباد:چینی حکومت کی دعوت پر، پاکستان کے صدر آصف علی زرداری، 25 اپریل سے یکم مئی تک چین کا دورہ کریں گے۔ صدر زرداری 25 سے 27 اپریل تک صوبہ ہونان کے شہر چھانگ شا کا دورہ کریں گے، جبکہ 28 اپریل سے یکم مئی تک صوبہ ہائی نان کے شہر سانیا کا دورہ کریں گے۔ صدر پاکستان صوبائی قیادت سے ملاقاتوں میں پاکستان۔ چین دو طرفہ تعلقات پر تبادلہ خیال کریں گے، خاص طور پر اقتصادی و تجارتی تعاون اور چین پاکستان اقتصادی راہداری پر بات چیت کی جائے گی۔
یہ دورہ چین اور پاکستان کے درمیان اعلیٰ سطح تبادلہ خیال کی طویل روایات کا حصہ ہے اور دونوں ممالک کے درمیان سفارتی تعلقات کے قیام کی 75 ویں سالگرہ کے موقع پر خصوصی اہمیت رکھتا ہے۔ یہ دورہ دونوں ممالک کی ہمہ موسمی اسٹریٹجک تعاون پر مبنی شراکت داری کو مزید مستحکم کرنے کے لیے دونوں ممالک کی گہری وابستگی کا مظہر ہے۔
