اسلام آباد:چینی وزیرِ خارجہ وانگ ای نے پاکستان کے نائب وزیرِ اعظم اور وزیرِ خارجہ اسحاق ڈار سے ٹیلیفون پر گفتگو کی۔منگل کے روز اسحاق ڈار نے ایران اور امریکہ کے درمیان مذاکرات کے لیے پاکستان کی سفارتی کوششوں کی تفصیلات سے آگاہ کیا، چین کی جانب سے امن کے قیام کے لیے کی جانے والی کوششوں پر شکریہ ادا کیا، اور اس عزم کا اظہار کیا کہ پاکستان چین کے ساتھ قریبی رابطہ اور تعاون جاری رکھتے ہوئے خطے میں امن کے قیام کے لیے مثبت کردار ادا کرے گا۔وانگ ای نے چین کے اصولی مؤقف کا اعادہ کرتے ہوئے پاکستان کی جانب سے امریکہ اور ایران کے درمیان عارضی جنگ بندی کے قیام اور اسلام آباد مذاکرات کی میزبانی کو سراہا، اور اسے منصفانہ اور متوازن سفارتی کردار قرار دیا۔ انہوں نے کہا کہ موجودہ جنگ بندی نہایت نازک ہے اور علاقائی صورتحال ایک اہم موڑ پر کھڑی ہے۔ اس وقت سب سے اہم بات یہ ہے کہ دوبارہ جنگ کے آغاز کو روکا جائے اور اس جنگ بندی کو برقرار رکھا جائے۔وانگ ای نے مزید کہا کہ عالمی برادری کو چاہیے کہ وہ امن کے فروغ اور مذاکرات کی بحالی کے لیے اپنی کوششیں تیز کرے، اور ہر اس اقدام کی واضح مخالفت کرے جو جنگ بندی کو نقصان پہنچائے یا کشیدگی میں اضافہ کرے۔ چین اور پاکستان کی جانب سے خلیجی اور مشرقِ وسطیٰ خطے میں امن و استحکام کی بحالی کے لیے پیش کردہ پانچ نکاتی اقدام عالمی اتفاقِ رائے کی عکاسی کرتا ہے اور مسئلے کے حل کے لیے ایک مؤثر سمت فراہم کر سکتا ہے۔ انہوں نے کہا کہ چین پاکستان کے مزید فعال کردار کا خیرمقدم کرتا ہے اور عالمی برادری کے ساتھ مل کر خطے میں جلد امن کے قیام کے لیے کوششیں جاری رکھے گا۔
