بیجنگ :دستاویزی پروگرام "ہیلو مائی چائینیز ڈاکٹر ” کی فلم بندی کا باقاعدہ آغاز کمبوڈیا کے کوسما ہسپتال میں جسے اب چین-کمبوڈیا فرینڈ شپ ہاسپٹل کہا جاتا ہے ،شاندار تقریب کے ساتھ کیا گیا۔ یہ پروگرام بیرونِ ملک خدمات انجام دینے والی چینی طبی ٹیموں پر مرکوز ہے اور چین اور کمبوڈیا کے درمیان طبی تعاون اور گہری دوستی کو اجاگر کرنے کے ساتھ ساتھ چین کے بطور ایک ذمہ دار بڑے ملک کے کردار کو نمایاں کرتا ہے۔چین-کمبوڈیا فرینڈ شپ ہاسپٹل ، جو چین کی جانب سے بلا معاوضہ تعمیر کیا گیا ایک اہم طبی منصوبہ ہے جو کمبوڈیا کے جدید سرکاری ہسپتالوں میں ایک نمایاں مقام رکھتا ہے اور دونوں ممالک کے درمیان صحت کے شعبے میں تعاون کا مرکز بن چکا ہے۔
یہاں تعینات چینی طبی ٹیم نہ صرف عام بیماریوں اور پیچیدہ امراض کا علاج فراہم کرتی ہے بلکہ روایتی چینی طب کو بھی فروغ دے رہی ہے۔ ایکیوپنکچر، مساج ، اور دیگر چینی طبی طریقہ علاج مقامی لوگوں میں بے حد مقبول ہو چکے ہیں اور مریضوں کو آرام فراہم کر رہے ہیں۔اس کے علاوہ ، چینی طبی ٹیم "تعلیم دینے ، مدد کرنے اور رہنمائی فراہم کرنے "کا طریقہ کار استعمال کرتے ہوئے مقامی طبی عملے کو تربیت فراہم کر رہی ہے، جس میں کلینیکل لرننگ ، تکنیکی رہنمائی ، اور پیشہ ورانہ تربیت شامل ہے۔ اس سے نہ صرف جدید طب بلکہ روایتی چینی طب کے تجربات بھی منتقل کیے جا رہے ہیں، تاکہ کمبوڈیا میں مقامی طبی صلاحیتوں کو فروغ دیا جا سکے اور مجموعی طبی نظام کو مضبوط بنایا جا سکے۔گزشتہ کئی برسوں میں چین نے طبی امداد کے شعبے میں دنیا بھر میں خدمات انجام دی ہیں ۔کمبوڈیا اور پاکستان سے لے کر ایشیا، افریقہ اور لاطینی امریکہ کے متعدد ممالک تک، چینی طبی ٹیمیں جدید اور روایتی طب کو یکجا کرتے ہوئے بے لوث خدمات انجام دے رہی ہیں، مختلف ممالک کے عوام کی صحت کا تحفظ کر رہی ہیں، اور مقامی سطح پر بھرپور پذیرائی اور اعتماد حاصل کر رہی ہیں۔آج کے غیر یقینی عالمی حالات میں چین اپنی مسلسل طبی امدادی سرگرمیوں کے ذریعے دنیا کو ہمدردی اور تعاون کا پیغام دے رہا ہے۔چین عالمی صحتِ عامہ کے شعبے میں استحکام پیدا کرنے میں کردار ادا کر رہا ہے اور عملی اقدامات کے ذریعے ایک ذمہ دار بڑے ملک کے طور پر اپنا فرض ادا کرتے ہوئے ” صحت کے حوالے سے بنی نوع انسان کے ہم نصیب معاشرے ” کی تعمیر کو فروغ دے رہا ہے۔
