بیجنگ : چین کے صدر شی جن پھنگ سے ترکمانستان کے قومی رہنما اور عوامی کونسل کے چیئرمین قربان قلی بردی محمدوف نے بیجنگ میں
ملاقات کی، جو چین کے دورے پر موجود ہیں۔
بدھ کے روز شی جن پھنگ نے کہا کہ چین ترکمانستان کے ساتھ مل کر تعاون کے نئے مواقع تلاش کرنے اور ترقی کے ثمرات سے مشترکہ طور پر مستفید ہونے کا خواہاں ہے، تاکہ چین۔ترکمانستان ہم نصیب معاشرے کی تعمیر کو مزید مضبوط بنایا جا سکے۔
انہوں نے زور دیا کہ بین الاقوامی صورتحال میں چاہے جتنی بھی تبدیلیاں آئیں، چین ہمیشہ ترکمانستان کی خودمختاری، آزادی اور علاقائی سالمیت کے تحفظ کی حمایت جاری رکھے گا، اور ترکمانستان کی مستقل غیرجانبداری کی پالیسی کی بھی تائید کرے گا۔
انہوں نے کہا کہ دونوں ممالک کو "بیلٹ اینڈ روڈ انیشی ایٹو” اور "شاہراہ ریشم کے احیاء” کی حکمت عملی کے درمیان ہم آہنگی کو تیز کرنا چاہیے، اور دہشت گردی، انتہا پسندی اور علیحدگی پسندی کے خلاف مشترکہ اقدامات کو مضبوط بنانا چاہیے۔
شی جن پھنگ نے مزید کہا کہ دونوں ممالک کو اقوام متحدہ کے کردار اور اختیار کا تحفظ کرنا چاہیے، حقیقی کثیرالجہتی نظام کو فروغ دینا چاہیے، اور عالمی نظم و نسق کو انصاف، شفافیت اور شمولیت کے اصولوں کے تحت آگے بڑھانا چاہیے۔
قربان قلی بردی محمدوف نے اس موقع پر کہا کہ ترکمانستان ایک چین کے اصول پر قائم رہے گا اور چین کے ساتھ ترقی، خوشحالی اور علاقائی استحکام کے لیے تعاون جاری رکھے گا۔ انہوں نے عالمی امور میں چین کے منصفانہ مؤقف اور شی جن پھنگ کی جانب سے پیش کردہ گلوبل انیشی ایٹوز کو سراہا۔
