ابوظہبی(سپورٹس ڈٰیسک) ابوظہبی ٹی10 کے گروپ مرحلے کے اختتامی میچ میں ڈی کن گلیڈی ایٹرز نے ویسٹا رائیڈرز کو 19 رنز سے شکست دے کر ایونٹ کا اختتام کامیابی کے ساتھ کیا۔ تاہم یہ فتح انہیں پلے آف میں پہنچانے کے لیے کافی ثابت نہ ہوئی، کیونکہ یو اے ای بُلز بہتر نیٹ رن ریٹ کی بنیاد پر اگلے مرحلے میں کوالیفائی کرگئے۔دفاعی چیمپئنز تین فتوحات کے ساتھ پوائنٹس ٹیبل پر چھٹی پوزیشن پر رہے۔
کپتان نکولس پوران نے سیزن کی کارکردگی کا جائزہ لیتے ہوئے کہا کہ دیانت داری سے کہوں تو ہماری کارکردگی مایوس کن رہی۔ ہمیں تسلیم کرنا ہوگا کہ اس سال ہم چیلنج کے مطابق نہیں کھیل سکے۔ گزشتہ پانچ برسوں میں ہماری ٹیم نے بہترین کارکردگی دکھائی ہے، لیکن جیت اور ہار کرکٹ کا حصہ ہیں۔
نکولس پوران کے ابوظہبی ٹی 10کی تاریخ کے دوسرے نمایاں ترین رنز اسکورر ہیں۔ 2017 سے 2025 کے دوران انہوں نے 1572 رنز 223 کے شاندار اسٹرائیک ریٹ کے ساتھ بنائے۔اس سیزن سے حاصل ہونے والے اسباق پر بات کرتے ہوئے انہوں نے کہا کہ ہم نے اس بار تسلسل برقرار نہیں رکھا، اور ٹی10 جیسا فارمیٹ عدم تسلسل برداشت نہیں کرتا۔ آج بھی ہم نے پوری کوشش کی مگر پلے آف تک پہنچنے میں ناکام رہے۔ لیکن بطور کھلاڑی ہمیں ہمیشہ اپنی بہترین نمائندگی کرنا ہوتی ہے۔
کپتان نکولس پوران نے ابھرتے ہوئے یو اے ای پیسر محمد جواد اللہ کی بھی خصوصی تعریف کرتے ہوئے کہا کہ جواد اللہ اس پورے سیزن میں ہمارے لیے بہت اچھا ثابت ہوا۔ اس کے پاس انتہائی درست وائیڈ یارکرز پھینکنے کی صلاحیت ہے جو ٹی10 میں بے حد کارآمد ہے۔ وہ باصلاحیت باؤلر ہے اور ہم امید کرتے ہیں کہ وہ مزید ترقی کرے گا۔
