علی امین گنڈا پور کا صوبے میں امن و امان کی صورتحال پر اگلے ہفتے آل پارٹیز کانفرنس بلانے کا اعلان

پشاور: خیبر پختونخوا کابینہ کے اجلاس میں وزیراعلی علی امین گنڈا پور نے صوبے میں امن و امان کی بگڑتی صورتحال پر اگلے ہفتے آل پارٹیزکانفرنس بلانے کا اعلان کر دیا۔ انھوں نے کہا کہ آل پارٹیز کانفرنس میں مشاورت کے لئے تمام سیاسی جماعتوں کے نمائندوں کو شرکت کی دعوت دی جائے گی۔ اس مسئلے کے پائیدار حل کے لئے مشترکہ لائحہ عمل ترتیب دینے کی ضرورت ہے۔جرگوں اور مقامی عمائدین کی مشاورت سے دیگر علاقوں میں بھی امن قائم کیا جاسکتا ہے۔

خیبر پختونخوا کابینہ کے اجلاس میں وزیراعلیٰ علی امین گنڈاپور نے صوبے میں امن و امان کی بگڑتی ہوئی صورتحال پر اگلے ہفتے آل پارٹیز کانفرنس بلانے کا اعلان کر دیا۔ وزیر اعلیٰ نے کہا کہ کانفرنس میں تمام سیاسی جماعتوں کے نمائندوں کو مشاورت کے لیے مدعو کیا جائے گا تاکہ اس اہم مسئلے کا پائیدار حل نکالا جا سکے۔

کابینہ اجلاس کے دوران علی امین گنڈاپور نے کہا کہ جرگوں اور مقامی عمائدین کی مشاورت سے دیگر علاقوں میں بھی امن قائم کیا جا سکتا ہے، جیسا کہ صوبائی حکومت کی کوششوں سے ضلع کرم میں بحال کیا گیا۔

اجلاس میں 3 ایم پی او کے قانون پر بھی تفصیلی غور ہوا، اور اس قانون میں اصلاحات لانے کا فیصلہ کیا گیا۔ اب 3 ایم پی او کا نفاذ محکمہ داخلہ خیبرپختونخوا کی پیشگی اجازت سے مشروط ہوگا تاکہ اس قانون کے غلط استعمال کو روکا جا سکے۔

علی امین گنڈاپور نے 3 ایم پی او کو ایف سی آر طرز کا قانون قرار دیتے ہوئے کہا کہ اس کا اکثر غلط استعمال کیا جاتا رہا ہے۔

اجلاس میں بھارتی فائرنگ سے شہید ہونے والے خیبرپختونخوا کے شہداء کے ورثاء کے لیے فی کس 50 لاکھ روپے معاوضے جبکہ دہشت گردی میں شہید ہونے والے مولانا خانزیب کے ورثاء کے لیے ایک کروڑ روپے امداد کی منظوری بھی دی گئی۔