دنیا کو جنگ سے بچانے میں پاکستان کی کامیابی سنہرے حروف سے لکھی جائے گی ،ایم این اے
اسلام آباد: پاکستان مسلم لیگ (ق) خواتین ونگ کی مرکزی صدر اور رکن قومی اسمبلی فرخ خان نے ایران اور امریکا ممکنہ جنگ بندی کی کوششوں پر وزیراعظم اور فیلڈ مارشل کو زبردست خراجِ تحسین پیش کیا ہے۔اپنے بیان میں فرخ خان نے کہا کہ پاکستان کی متوازن اور فعال سفارت کاری نے عالمی برادری کو مثبت پیغام دیا کہ امن ہی ہماری اولین ترجیح ہے، اور یہ کامیابی مستقل قیامِ امن کی جانب ایک اہم سنگ میل ہے۔ انہوں نے فیلڈ مارشل عاصم منیر کی کاوشوں کو بھی سراہتے ہوئے کہا کہ ان کی قیادت میں پاکستان نے عالمی اور علاقائی سطح پر سفارتی توازن کا شاندار مظاہرہ کیا، وزیراعظم اور عسکری قیادت کی مشترکہ کوششوں سے دنیا ایک بڑی تباہی سے بچ گئی، پاکستان نے خطے میں امن کے قیام کے لیے اہم اور مؤثر کردار ادا کیا ہے۔ ان کا کہنا تھا کہ تاریخ میں جب بھی اس کشیدگی کا ذکر ہوگا، پاکستان کا نام نمایاں طور پر لکھا جائے گا، دنیا کو جنگ سے بچانے میں پاکستان کی کامیابی سنہرے حروف سے لکھی جائے گی اور یہ ایک تاریخی لمحہ بن چکا ہے۔ فرخ خان نے کہا کہ خطے میں امن کے لئے پاکستان کا کردار عالمی سطح پر تسلیم کیا جانا ایک بڑا اعزاز ہے، پاکستان نے عالمی سیاست میں غیر معمولی سفارتی حکمت عملی سے سب کو حیران کر دیا۔ ان کا کہنا تھا کہ مستقبل میں بھی پاکستان امن معاہدوں کیلئے مذاکرات میں کامیابی حاصل کرے گا اور دنیا کے قدیم تہذیبی ورثے کے تحفظ میں اپنا کردار ادا کرتا رہے گا۔انہوں نے کہا کہ دعا ہے کہ اسلام آباد میں حالیہ مذاکرات کامیابی سے مکمل ہو جائیں اور خطے میں جنگ کا مکمل خاتمہ ہو۔
