بیجنگ :چینی وزارت خارجہ کے افغان امور کے خصوصی نمائندے یوئے شیاؤ یونگ نے افغانستان اور پاکستان کا دورہ کیا اور دونوں ممالک کے درمیان حالیہ کشیدگی کے تناظر میں سفارتی سطح پر مصالحت کی کوششیں کیں ۔دورے کے دوران انہوں نے افغانستان میں افغان وزیر خارجہ امیر خان متقی اور وزیرِ صنعت و تجارت نورالدین عزیزی سے ملاقات کی، جبکہ پاکستان میں انہوں نے سیکریٹری خارجہ آمنہ بلوچ اور وزیرِ اعظم پاکستان کے افغانستان امور کے خصوصی نمائندے محمد صادق خان سے بات چیت کی۔انہوں نے دونوں ممالک پر زور دیا کہ وہ تحمل اور بردباری کا مظاہرہ کریں، جلد از جلد جنگ بندی کریں اور اختلافات کو مذاکرات اور بات چیت کے ذریعے حل کریں۔افغانستان اور پاکستان دونوں نے چین کی جانب سے کی جانے والی مصالحتی کوششوں پر شکریہ ادا کیا اور اس عزم کا اظہار کیا کہ مسائل کے حل کے لیے سیاسی اور سفارتی ذرائع اختیار کیے جائیں گے۔
