اسلام آباد (نیوز ڈیسک) بیکن ہاؤس نیشنل یونیورسٹی کے زیر اہتمام "پاک چین میڈیا تعاون: بیانیے کا ارتقاء اور مواقع” کے عنوان سے ایک پروقار سیمینار کا انعقاد کیا گیا ، جس میں دونوں ممالک کے درمیان میڈیا روابط کو گہرا کرنے اور عوامی سطح پر تبادلوں کو فروغ دینے کے عزم کا اعادہ کیا گیا۔ اس اہم تقریب میں چائنا میڈیا گروپ سے نورین ہو، کمیونیکیشن یونیورسٹی آف چائنا سے ژانگ یان چیو، سینئیر صحافی ناصر جمال اور فریحہ ادریس نے شرکت کی اور میڈیا کے شعبے میں تعاون کی موجودہ صورتحال اور بیانیے میں جدت لانے کے حوالے سے سیر حاصل گفتگو کی۔جمعہ کے روز سیمینار کے دوران ماہرین نے اس بات پر زور دیا کہ اب روایتی اور وسیع تر بیانیوں کے ساتھ ساتھ عام لوگوں کی زندگیوں سے جڑی مختصر اور مؤثر کہانیوں، یعنی "مائیکرو اسٹوریز” کو بھی اجاگر کرنے کی ضرورت ہے تاکہ دونوں ممالک کے عوام کے درمیان باہمی قربت اور ہم آہنگی کو فروغ دیا جا سکے۔ شرکاء نے سوشل میڈیا کے مؤثر استعمال کے ذریعے نوجوانوں کی تخلیقی صلاحیتوں کو بروئے کار لانے، صحافیوں کے لیے طویل مدتی تبادلہ پروگراموں کے اجراء اور زبان کی تربیت کو مضبوط بنانے کی تجاویز پیش کیں۔ اس کے علاوہ جامعات اور تھنک ٹینکس کے مابین اشتراکِ عمل کو فروغ دینے، نیز ثقافتی اور تفریحی سرگرمیوں کے تبادلوں کے ذریعے پاک چین ہمہ جہت اسٹریٹجک تعاون کو مزید وسعت دینے کی اہمیت پر بھی روشنی ڈالی گئی۔اس سیمینار نے مستقبل میں پاک چین میڈیا تعاون کی سمت متعین کرنے اور باہمی مفاہمت کو گہرا کرنے میں اہم کردار ادا کیا ہے جس سے دونوں دوست ممالک کے تعلقات میں ایک نئے باب کا اضافہ ہوگا۔
