ایس سی او تھیان جن سربراہ اجلاس شنگھائی تعاون تنظیم میں ایک نئے باب کا آغاز کرے گا، صدر تاجکستان

بیجنگ : تاجکستان ، شنگھائی تعاون تنظیم کے بانی رکن ممالک میں سے ایک ہے۔ شنگھائی تعاون تنظیم کے تھیان جن سربراہ اجلاس اور جاپانی جارحیت کے خلاف چینی عوام کی مزاحمتی جنگ اور فسطائیت مخالف عالمی جنگ کی فتح کی 80 ویں سالگرہ کی تقریب میں شرکت کے لئے چین روانگی کے موقع پر تاجکستان کے صدر امام علی رحمان نے دوشنبے میں چائنا میڈیا گروپ کو خصوصی انٹرویو دیا۔

ان کے خیال میں تھیان جن سربراہ اجلاس ایس سی او رکن ممالک کے درمیان تعاون اور شنگھائی تعاون تنظیم کی ترقی میں ایک نئے باب کا آغاز کرے گا۔ صدر رحمان نے کہا کہ شنگھائی تعاون تنظیم نے خود کو کثیر الجہتی تعاون کے لئے ایک کامیاب اور بااثر پلیٹ فارم کے طور پر ثابت کیا ہے، جو سیکیورٹی، معیشت اور ثقافت سمیت مختلف شعبوں میں فعال کردار ادا کر رہا ہے۔ انہوں نے کہا کہ 2024ء میں تاجکستان اور چین کے تعلقات کو نئے دور میں جامع اسٹریٹجک تعاون کی شراکت داری میں اپ گریڈ کیا گیا اور تاجکستان اور چین کے درمیان عملی تعاون تیزی سے فروغ پا تے ہوئے مختلف شعبوں میں توسیع کی جانب بڑھ رہا ہے۔

دونوں ممالک کے درمیان معیشت، تجارت، مالیات، تعلیم، صحت، صنعت اور دیگر شعبوں میں تعاون فروغ پا رہا ہے۔ان کا کہنا تھا کہ تاجکستان اپنی "2030 قومی ترقیاتی حکمت عملی” کو بیلٹ اینڈ روڈ انیشی ایٹو کے ساتھ ہم آہنگ کر رہا ہے۔ تاجکستان نے چین کے ساتھ بہت اچھے تعلقات برقرار رکھے ہیں اور باہمی تعاون کو مسلسل مضبوط بنایا جا رہا ہے۔