اسلام آباد کی عدالت نے شراب برآمدگی کیس میں وزیراعلیٰ کے پی کو دفعہ 342 کا بیان ریکارڈ کرانے کے لیے آخری موقع دیدیا عدالت نے وزیراعلیٰ کی حاضری سے استثنیٰ کی درخواست مسترد کردی اور ایک بار وارنٹ جاری کرکے گرفتار کرنے کا حکم دے دیا۔
تفصیلات کے مطابق ڈسٹرکٹ اینڈ سیشن کورٹس اسلام آباد میں وزیراعلیٰ کے پی علی امین گنڈا پور کے خلاف شراب و اسلحہ برآمدگی کیس کی سماعت ہوئی۔ جوڈیشل مجسٹریٹ مبشر حسن چشتی نے کیس پر سماعت کی۔ علی امین گنڈا پور اور ان کے وکلاء عدالت میں پیش نہ ہوئے۔
جج نے کہا کہ بار بار کیس کال کرنے پر بھی کوئی عدالت میں پیش نہیں ہوا، علی امین گنڈا پور کو 342 کا بیان ریکارڈ کروانے کیلئے اڑھائی بجے تک آخری موقع دیا جاتا ہے، اگر اڑھائی بجے تک علی امین گنڈا پور اور وکیل پیش نہیں ہوتے تو342 کے بیان کا حق ختم کردیں گے۔ بعدازاں وقفہ کردیا گیا۔
وقفے کے بعد سماعت ہوئی توعلی امین گنڈا پور کے وکیل راجہ ظہور الحسن عدالت میں پیش ہوئے اور سینیٹ انتخابات میں مصروفیت کے باعث علی امین گنڈاپور کی حاضری سے استثنیٰ کی درخواست دائر کردی۔
جج مبشر حسن چشتی نے کہا کہ 342 کا بیان ریکارڈ کروادیں بصورتِ دیگر حق ختم کردیں گے۔
وکیل راجہ ظہور الحسن نے کہا کہ انڈر ٹیکنگ دے دیتے ہیں کہ آئندہ سماعت پر علی امین گنڈاپور عدالت میں بھی پیش ہوں گے اور 342 کا بیان بھی ریکارڈ کروائیں گے، 7 ملزمان اس کیس سے بری ہو چکے ہیں، علی امین گنڈاپور کی بریت کی درخواست بھی دائر کر رکھی ہے اس پر بھی ابھی فیصلہ نہیں ہوا۔
جج مبشر حسن چشتی نے کہا کہ علی امین گنڈاپور نے عدالت میں کھڑے ہوکر 342 کا بیان ریکارڈ کروانے کی یقین دہانی کروائی تھی، تاریخ بھی علی امین گنڈا پور کی مرضی سے دی گئی تھی۔
وکیل راجہ ظہور الحسن نے کہا کہ پشاور ہائیکورٹ نے تمام کیسز میں علی امین گنڈاپور کی ضمانت بھی منظور کر رکھی ہے، ایک تاریخ دے دی جائے آئندہ سماعت پر 342 کا بیان ریکارڈ کروا دیں گے۔
جج مبشر حسن چشتی نے کہا کہ آپ اپنی درخواستیں دے دیں کچھ دیر میں آڈر کرتے ہیں۔
بعدازاں جج نے علی امین گنڈا پور کے وارنٹ گرفتاری جاری کردیئے اور علی امین گنڈا پور کو گرفتار کرکے عدالت میں پیش کرنے کا حکم دے دیا اور علی امین گنڈا پور کی حاضری سے استثنیٰ کی درخواست مسترد کردی۔
عدالت نے کیس کی سماعت 22 جولائی تک ملتوی کردی۔
