اسلام آباد: چیئرمین سی ڈی اے و چیف کمشنر اسلام آباد محمد علی رندھاوا کی سربراہی میں وفاقی دارالحکومت میں کمرشل پلاٹس اور بلیو ایریا کے پارکنگ پلازہ کی دوکانوں کی شفاف نیلام عام کا عمل 15 جولائی سے جناح کنونشن سینٹر میں کامیابی سے جاری ہے، جو 17 جولائی تک جاری رہے گا۔
تین روزہ نیلامی میں مختلف کٹیگریز کے 46 پلاٹس اور دوکانیں سرمایہ کاروں کے لیے اوپن آکشن کے ذریعے پیش کی گئی ہیں، جن میں بلیو ایریا سمیت دیگر اہم تجارتی مراکز کے پلاٹس شامل ہیں۔ نیلامی میں سرمایہ کاروں اور بزنس کمیونٹی کی دلچسپی قابلِ دید ہے۔
چیئرمین سی ڈی اے کی خصوصی ہدایات پر ممبر اسٹیٹ طلعت محمود، ممبر فنانس طاہر نعیم اور ممبر پلاننگ ڈاکٹر خالد حفیظ نیلام عام کی نگرانی کر رہے ہیں۔ اس کے علاوہ ایک اعلیٰ سطحی کمیٹی بھی تشکیل دی گئی ہے جس کی سربراہی ممبر فنانس کر رہے ہیں، جبکہ کمیٹی میں ڈی جی ریسورس، ڈی جی بلڈنگ کنٹرول، ڈی جی لا اور دیگر افسران شامل ہیں۔
نیلامی کے ساتھ ساتھ سی ڈی اے نے سرمایہ کاروں اور بزنس کمیونٹی کی رہنمائی و سہولت کے لیے "انویسٹمنٹ ایکسپو” کا بھی انعقاد کیا ہے، جس میں انوائرمنٹ ونگ، ایم سی آئی اور سپورٹس و کلچر ڈائریکٹوریٹ کے جانب سے انفارمیشن بوتھ قائم کیے گئے ہیں۔
سرمایہ کار دوست اقدامات کے تحت یکمشت ادائیگی پر 5 فیصد رعایت جبکہ امریکی ڈالر میں ادائیگی کی صورت میں مزید 5 فیصد اضافی رعایت فراہم کی جا رہی ہے۔ ہر سطح پر فسلیٹیشن ٹیم موجود ہے تاکہ سرمایہ کاروں کو مکمل رہنمائی اور سہولیات فراہم کی جا سکیں۔
محمد علی رندھاوا نے اس موقع پر کہا کہ نیلامی سے حاصل ہونے والی آمدنی اسلام آباد کی تعمیر و ترقی، سیکٹر ڈویلپمنٹ، روڈ انفراسٹرکچر کی بہتری اور شہر کی خوبصورتی پر خرچ کی جائے گی، تاکہ وفاقی دارالحکومت کو ایک مثالی ماڈل سٹی بنایا جا سکے۔
