حالیہ پاک بھارت کشیدگی کے اثرات ایک بار پھر فن و ثقافت پر نظر آنے لگے ہیں۔ معروف پاکستانی گلوکار اور اداکار علی ظفر کو بالی ووڈ فلم میرے برادر کی دلہن کے پوسٹر اور ساؤنڈ ٹریک کور سے ہٹا دیا گیا ہے۔
فلم میں علی ظفر نے اہم کردار نبھایا تھا اور ان کے گانے فلم کی موسیقی کا نمایاں حصہ تھے، مگر اب سوشل میڈیا اور مختلف میوزک پلیٹ فارمز پر جاری کی گئی نئی کور تصاویر میں ان کی موجودگی غائب ہے۔
فلم میں ان کے ساتھ معروف اداکارہ کترینہ کیف نے بھی مرکزی کردار ادا کیا تھا۔
یہ اقدام ایسے وقت سامنے آیا ہے جب پاکستان اور بھارت کے درمیان سفارتی و عسکری سطح پر ایک بار پھر تناؤ بڑھ رہا ہے۔
کشیدگی کے پیش نظر بھارتی فلم انڈسٹری میں پاکستانی فنکاروں کے خلاف ماحول سخت ہوتا جا رہا ہے۔
اس سے قبل بھی مختلف مواقع پر پاکستانی فنکاروں پر پابندی لگائی جا چکی ہے یا انہیں ان کے جاری منصوبوں سے ہٹا دیا گیا ہے۔
علی ظفر بھی اب ان فنکاروں کی فہرست میں شامل ہو گئے ہیں جنہیں پاک بھارت تنازعے کی وجہ سے فنکارانہ سرگرمیوں سے الگ کیا جا رہا ہے۔
