امارات میں کل سے 24 فروری تک خصوصی تقریبات منعقد ہوں گی
ابوظہبی:فیفا کلب ورلڈ کپ 2025 ٹرافی ٹور جلد متحدہ عرب امارات پہنچنے والا ہے۔ا مارات نیوز ایجنسی وام کے مطابق فیفا نے اعلان کیا ہے کہ ٹرافی ٹور کا ایشین مرحلہ شروع ہونے جا رہا ہے، جس کے تحت امارات میں کل (ہفتہ )سے 24 فروری تک خصوصی تقریبات منعقد ہوں گی۔ابوظہبی اور العین سمیت متحدہ عرب امارات کے نمایاں مقامات پر ایک شاندار ایونٹ سیریز ترتیب دی گئی ہے، جس کا مقصد ٹورنامنٹ کی عالمی سطح پر پذیرائی اور فٹبال کے شائقین کی دلچسپی بڑھانا ہے۔اس موقع پر العین کلب ایشیا کا پہلا فٹبال کلب ہوگا جو اس ٹرافی ٹور کی میزبانی کرے گا۔ادھر فیفا کے صدر، جانی انفانٹینو نے نیویارک، امریکا میں ایک خصوصی تقریب کے دوران فیفا کلب ورلڈ کپ 2025 کی نئی ٹرافی کو "نئی تاریخ کی شروعات قرار دیا۔ اس تقریب میں ٹرافی ٹور کے باضابطہ آغاز کا اعلان بھی کیا گیا، جو دنیا بھر کے فٹبال شائقین کو کلب فٹبال کے سب سے بڑے اعزاز کو قریب سے دیکھنے کا منفرد موقع فراہم کرے گا۔فیفا کے مطابق، یہ نئی ٹرافی فیفا کے اشتراک سے عالمی شہرت یافتہ جیولری برانڈ "ٹیفنی اینڈ کونے تیار کی ہے۔اس ٹرافی کو آئندہ مہینوں میں تمام 32 شریک کلبوں کے شہروں میں لے جایا جائے گا، جہاں یہ فٹبال کے شائقین کو مسحور کرے گی اور ٹورنامنٹ کے لیے جوش و خروش بڑھائے گی۔فیفا کلب ورلڈ کپ 2025 11 میزبان شہروں کے 12 سٹیڈیمز میں منعقد ہوگا، جو 14 جون کو میامی، امریکہ میں شروع ہوگا اور 13 جولائی کو نیویارک کے میٹ لائف سٹیڈیم میں فائنل کے ساتھ اختتام پذیر ہوگا۔
